Dimapur nung National Youth Day amung

Dimapur, January 31 (TYO) : Deobarnü Shri Ramakrishna Society (SRS), Duncan, Dimapur-i National Youth Day ayongzüka amung aser iba sentong nung tongti tesemdangerji Dimapur Municipal Council, Administrator, H. Atokhe Aye liasü.
National Youth Day ya Swami Vivekananda tasoba anogo January 12 nü amunger, ajisüaka SRS-i Swami Vivekananda indang 154 buba tasoba anogomungji January 31 nüa ang amungtsü thinena liasü.
Linük ajungalen school aser college academic calendar nung Swami Vivekananda indang tasoba anogomung kanga temulung agüja amunger. Ajisüaka, Swami indang tesayubatem sülen manidakra, pa indang tasoba anogo amungbaji tetezü kecha mali, ta Atokhe-i tongti tesemdanger o jembidang ashi.
“Vivekananda tesayuba ajanga lanur telok aika ajungmesogo aser iba tangatetba nung lanurtem ‘art, culture & education’ nung anitettsü meranger” ta paisa ashi.
Ramakrishna mission ama telok ka Dimapur nung tenteta alibaji kanga tia taka, kechiyong iba telok ajanga shisaliok rejutem aika lapoka ketdangsür, ta Atokhe-isa ashi.
Iba sentong nung tetushi süa jaoker Prof (retd) KP Avikasit-ia kaketshirtem dang Swami Vivekananda indang taküm otsü metetdaktsü.