Dimapur nung NERP senden amen

Dimapur, May 16 (TYO): Tang tagidak National Electoral Roll Purification (NERP) maparen dak sentakba nung Deputy Commissioner aser District Election Officer, Dimapur nati administrative ketdangsertem, recognized political party tem nungi züngsemtem, GBs aser Dimapur nung colony/ward council chairman tem den May 16 nü DC conference hall nung senden ka amen.
Iba senden nung jembidang Deputy Commissioner, Dimapur Kesonyu Yhome-i NERP exercise indang nükjidongtem metetdaktsüba den külemi BLOs teinyaktsütem indang metetdaktsü aser parnok dang BLOs kari danga pei mapa junga meinyakra pa nem osang metetdakjang, ta ashi.
DC-isa, electoral roll reprangshiba ya maneni inyakba maparen ka lir, ta ashi.
Nisung ka arishi küm agi vote agütsütsü temsüa kümra tim lenmang ajanga mapang mashi ka nung electoral roll nung tenüng züluoktettsü, ta paisa metetdaktsü.
DC-i sentepa alirtem dang electoral inyakyim ochishia benoktettsü atema parnok nem nungitdaktsüner aser tebilembatem benokdaktsüner, ta mepishi.
Maneni DC-i Ward Chairman tem dang parnok nem agütsüba tashi amshia inyaktsüla ta ashiba den külemi certificate agütsüdang kechi nüngdak atema’ar ibaji zülutsüla, ta ashi.
Iba senden nung tongtibangsüa vote agütsütsü temsüa aliba, tenüng khen dak tali züluba, voter ID yanglushiba onüktem lemtepa liasü.