Dimapur nung nisung 3 tepsetertem puogo

Dimapur, Aami (June) 12 (TYO): Dimapur nung lanur asem tepseter lia anguba sülen anogo 9 lir Dimapur police-i Mongulbarnü Karbi Anglong nung nisung ana apuba ajanga iba ken o tembanga bushitetogo.
Nisung asem tepsetertemji Aron Rongpi (19) aser Waisong Engti/Bimol Singh Teron (18) na lir ta jangjaogo.
Aron ya Shikari Timong yimer Monsing Rongpi’er jabaso aser Waisong ya Beran Teron yimer asür Lee Engti’er jabaso lir. Yimtsüng anaprong ya Diphu police station telongtet kübok lir.
Dimapur police PRO & ADCP (Crime), Yarenthung Ngullie-i aniba telok kati iba ken o bushisüngdanga aru aser pai ashiba agi, “nisung tepsetertem ta temulung melemi bilemertem indang technical inputs kecha maliba ajanga timtem tulu ajuru.”
Ajisüaka,Superintendent of Police, Diphu, Officer in Charge, Manja (Karbi Anglong) aser iba tesem nung alirtemi yaritepba temulung melemi bilemba nisungtem indang ki bushitet, ta paisa ashi.
Assam police teyari agia parnoki tanü anüngdang nisung anaji apu aser iba sülen tena Dimapur-i anir aruogo, ta Yarenthung Ngullie-isa metetdaktsü.
Tena dang asüngdangya asüdang, tenati külem medemertem tepsetba sülen railway station-i ao aser anepdang 7:00 ako nung Diphu atong aser idak nung jagi tenaprong pei pei yimtsüngi aoba nangzük.
Tenaprongi nisung tepsetba nangzükogo aser kechi atema tepset’ar metettsü atema asüngdangyatsü, ta Yarenthung-isa ashi.