Dimapur nung nisung 3 tsükset

Dimapur, April 30 (TYO): Dimapur kübok Chumukedima anasa National Highway- 29 nung Deobar anüngdang mejangjatetba gari kati nisung asem tsükset.
Nisung asemji scooter ka nung mener lia gari jagi tsükdoker jena ao, ta osang angazüker.
Lendong atalokba osang angashili traffic ketdangsertem tesem tonga orr yirua alirtemji HK hospital, Chumukedima nung anepalutsü atema anir ao. Ajisüaka, par asemprongla mozükidang asü.
Lendongji nisung maliba tesem ka nung atalokba agi gariji mejangjateti lir, ajisüaka temulung melemi bilemba gari indang osangji tanga check post aser police station tem nem osang sangoktsüogo, ta traffic ketdangser kati ashi.
Tanü lendong nung taküm samar ajakji Mokokchung district kübok Longkong yimertem lir aser parnokji K Imsong (küm 38), Limalepzuk Longkumer (küm 45) aser Limakumba Jamir (küm 35) ta jangjaogo.
Par asem indang mang tendanga reprangba sülen kinünger ket nung agütsüogo aser iba dak sendakba nung ken o benoker bushisüngdang ka tenzükogo, ta ketdangserisa shisem.