Dimapur nung nisung ka khaset; Chief minister & DDCF-i aitsür

Dimapur, Aug 2 (TYO) : Tanü Deobar anüngdang 11:00 ako nung mejangjatetba nisung kari business inyaker tsümar ka khasetogo.
Tasüsangji arishi küm 55 tain ka tenüng agi Ashish Saha liasü ta jangjaogo. Pa ya tang Babulal Kachari colony, Signal nung lia liasü. Pa dak chitepa yur tenütsü nung khaloktsüba zübo liasü. Iba lendong atalokba sülen Police-i 7.65 prangpong injang terep ka nisung khasetdakji angu.
Angazükba agi, nisung ana gypsy nung mener aru aser pa dang gari nungji amentsü ashi, saka pai manga, anungji idangjisa paji khaset aser tenaji yang nung jagi jena ao. Iba nisungba ya shibai kechiba khasetar mejangjateter.
Iba lendong osang angashia, Chief Minister T.R. Zeliang-i nisung khasetba mapaji aitsüogo. “Tang ama Naga nunger ajaki yimjung aginüa aliba mapang ka nung iba ama ozüng raksaba mapa inyakba jagi asen lokti menentsür, anungji ajaki aitsütsüla,” ta Chief ministeri metetdaktsü. Paisa Dimapur police dang nisung khasetertemji tekaratiba nung aputsüla, ta metetdaktsüogo.
Dimapur District Citizens Forum (DDCF)-ia tanü Dimapur nung nisung khasetba osang angashia taitsüba osang ka metetdaktsüogo.
Parnokisa Dimapur police dang nisung khasetertemji pur nisung khasetba kuliji asüngdangtsüla, ta takangba ka agütsüogo.
DDCF tir, Wb.N Joseph Lemtur-i nübortem dang Dimapur police dak temulung lema ajemajema atadaktsüner, ta metetdaktsüogo.
Tang ama Nagaland nung alirtemi Nagaland nungi Armed Forces Special Powers Act agientsü asoshi takangba agüja inyakdang, iba ama atalokba yagi asenok tuluka nung akoksatsü, anungji iba ama mapa tamajung inyakertemi item onük aser tensa angatettsüla, ta paisa mepishia metetdaktsü.