Dimapur nung nisung kati kinüngtsü aser jabaso tepset

Dimapur, July 24 (TYO) : July 23 aonung, Airport junction, Dimapur anasa aliba Kirha yimtsüng nung kinungbo kati pa kinüngtsü den jabaso ka tepset.
Ano iba nisung jagi par jabaso arishi küm 4-5 shi tain ka yirutsü, ta Addl.Dy. Commissioner of Police/PRO Dimapur-i sangdong ka nung metetdaktsü.
Brihostibar aonung 9:30 ako meta kidangertemi iba tatalokba osang police nem sangoktsü aser iba sülen police tesem tonga orr reprangdangdang tasümang anaji angu.
Police-i mang nung zübo alibatem reprangdangdang nok agi alepba ama ajitetogo aser yirua aliba tanubosang jia tekong nung nok agi alepba zübo lir. Pa mozü kidang anepaludar, ta Dimapur police-isa ashi.
Kinüngtsü o jabaso na lepsetsangji Vikas Kachari ta jangjaogo aser pa ya iba tatalokba sülen jenogo. Pa kinüngtsü tenüngji Laxmi aser jabasoji Tunu liasü.
Police-i teinyaktsütem inyakba sülen mang anaji yimer lennirtem ket nung agütsüogo aser iba dak sendakba asoshi Diphupar police station nung ken o ka benokogo.
Dimapur police-i Vikas Kachari aputsü atema bushisüngdang südar aser pa indang osang metetertemi police dang ashitsü mepishia metetdaktsüogo.
Ano, July 23, 2015 nü Seithike Basa nung aliba Chathe ayong nung police-i tasümang ka angu/
Iba nisungji Suriajan nung alir Sumit Gupta liasü aser pai pa indang Wagon-R gari ka taa yonga amshi, ta police-i bushisüngdang asüdang buishitetogo.
Sumit ya Dimapur-i passenger kar anir aruba sülen sama ta osang angazüker. Police-i pa indang gari den pa tepsetertem bushitsü mapa tenzükogo, ta Dimapur police sangdong nungsa shia lir.