Dimapur nung nisung shibelenba mapa putet

Dimapur, April 11 (TYO) : Dimapur Police kübok District Anti-Human Trafficking Unit (DAHTU) purtemi Dimapur nungi tetsür chanu ana Pune nung lia kümzüka anir aruba sülen Nagaland nung shibelenba mapatem putetogo.
Dimapur nung Women Police Station nung alirtemi Pune nung “Shelter Home” ka nung Nagaland nungi aoba tetsür ana temang ayokdak nungi kümzüka lir ta osang aruba sülen, parnok oagi tetsür anaji kümzüka March 21 nü to anir aruogo.
Item tetsürtem jagi agütsüba osang nung ajemdaker nisung shibelenertemji bushia aoba mapang DAHTU-i nisung pezü apu. Par pezüji kar Assam nung aser kar Nagaland nung apu aser parnokji kasa maparentem nung shilem agiba puteta lir.
Nisung shibelenertem jagi nisung kar ajioka ayutsü aser parnok dangji mapa tajung agütsütsü nangzüker tesem balalai bener aor. Police-i parnok jagi pur aoba nisungtem mengui kar danga lira, itemjia dena kümzüktsü asoshi bushidagi. Pune nungi kümzüka anir aruba tetsür chanu anatobo parnok tsürabur ket tongtsüogo.
Iba nisung shibelenba mapa nung apurtemji Johur Uddin S/o late Md. Adibali of Goriarmari village, Borpata, Assam aser tang Tenyiphe-I, Dimapur nung alir; Jorina Khatoon @ Zina W/o Johur Uddin of Goriarmari village, Borpata, Assam aser tang Tenyiphe-I, Dimapur nung alir; Saiful Uddin @ John @ Rahul Dev S/o Sushil Dev of Tezpur, Assam aser tang telidak Phaipijang, Dimapur; Farukh Uddin @ Farukh @ Omar S/o late Siraj Ali of Murigaon, Assam.