Dimapur nung NSCN(IM) züngsem 2 aser gari auyar 2 apu

Dimapur, November 28 (TYO) : November 26, 2015 nü Zone-I kübok Dimapur Police-i Blue Hill Station area, Dimapur nung NSCN (IM) züngsem ana – ‘captain’ P.S. Aleng aser ‘captain’ Max Lolly na apu.
Tenati Manipur-i aoba Taxi (winger) gari ka indang japi den külemi kulikakettem rakzük aser itemji meyipa agütsütsü atema sen lakh 3 tashiyim agi meshiba atema Anti- Extortion Team-i apu, ta Addl. Dy Commissioner of Police/PRO, Dimapur-i sangdong ka nung metetdaktsü.
Tena sen tabeni arudang police telok ka ataa liasü aser tena dang police ket nung bendanga agütsütsü ashi saka mezüngbo tenati injang kahloktsütsü merang. Ajisüaka police telok jagi tena apu aser tena ket nungi .32 pistol den round 6, Cough Syrup bottle 6 aser tenati rakzüka bener aoba gari indang osettem angu, ta Dimapur Police sangdong nungsa shia lir.
Iba dak sendakba nung Dimapur East Police Station nung ken o ka benokogo aser maneni bushisüngdang südar.
Ano, November 27, 2015 nü Phaipijang village youth volunteers-i gari auyar nisung ana apu.
Iba nisung ana yagi Motor Cycle ka aser Auto Rickshaw ka auyar aotsü lia Phaipijang lanurtemi tena apu aser police ket nung agütsü, ta Addl. Dy Commissioner of Police/PRO, Dimapur sangdong nung metetdaktsü.
Auer anaji Nagaon, Assam kübok Chaparmukh yimer Abdul Ali’er jabaso Rafiq Ali aser Nagaon kübok Razoli yimer Md. Jahur Ali’er jabaso Surus Ali na lir ta jangjaogo. Tena anema East Police Station nung ken o ka benokogo aser maneni bushisüngdang südar, ta sangdong nungsa shia lir.