Dimapur nung October ita atema DPDB senden agi

Dimapur, October 21 (TYO) : Dimapur district nung October ita atema District Planning & Development Board senden October 20, 2015 nü agi.
Iba senden ya Deputy Commissioner, Dimapur Conference Hall nung Irrigation & Flood control Parliamentary Secretary aser DPDB Dimapur Chairman, Jacob Zhimomi lenisüba kübok agi.
Junga mereprangi society nem temelaba agütsüba ajanga sorkar nem khuret bener arutsür, anungji society tem registration asüdang kanga jungjunga repranger ang temelaba agütsütsüla ta senden nung Board züngsemtemi telemtetba agi.
Tang nungi society registration asütsü atema shidi agütsürtemi osang tejangja agütsütsüla aser society indang teinyaktsü aser alizüngtem jungjunga reprangdangba sülen ang temelaba agütsütsü, ta Board-isa lemtet.
Taoba DPDB senden nung benoka olemtep onüktem meyipa reprangdangba sülen Board-i Hands of Grace Ministry, Rev. Longri Mission Foundation, The Dimapur Gym Club, Longchen Development Welfare Society Dimapur, Shiv Shakti Bolbam Seva Sibir Charitable Trust, Tamlu Buhu Union Cultural Troupe, 4th mile, Dimapur Life Challenge aser North East Zone Cultural Centre Employees Association nungertem registration asütsü temelaba agütsü.
Board-isa 2015-16 atema LADP agizük aser LAPD Implementing Committees shimtsü atema Dimapur DC, Kesonyu Yhome (IAS) nem tashi agütsü.
October ita atema senden nung Economics & Statistics aser Employment Exchange-i pei pei department presentation agütsü aser taruba senden nung Horticulture aser Social Welfare department nem mapa lemzüktsü.
Senden nungsa PHE Minister, Tokheho, Urban Development Advisor, S.I. Jamir aser MLA Tovihoto o MLA Zhaleo Rio nungertem aden.