Dimapur nung ‘odd-even’ inyakyim magiener; Taila osang yanglua prokshir nisung 5 apu

Dimapur, May 17 (TYO): Dimapur Commissioner of police-i May 8, 2020 nü Dimapur nung garitem odd-even lemsar senzütsü ozüng agütsüba magiener, ta Deobarnü metetdaktsüogo.
Iba tetuyuba ya mezüngbo anogo tenetnü (May 11-17, 2020) atema dang agütsü saka tanga sangdong tasen ka magütsü tashi benshitsü, ta Dimapur CP, Rothihu Tetseo, IPS-i tanü ashi.
Külen, Dimapur Police-isa taila osang yanglua prokshirtem kar apuba osang metetdaktsüogo.
Agri Expo Dimapur nung lapoka aliba quarantine center nung tangalen nungi arur nisung 20 jena ogo ta taila osang ka WhatsApp nung prokshi. Iba taila osang ya kuli mebushitepi social media nung kanga prokshi, ta Dimapur Police-i ashi.
Iba taila osang ya Amy Merry (40) ta ser tetsür kati text message nung zülur prokshiba bushitet.
Police-i la dang asüngdangya asüdang lai text message ji zülu aser lar medemertem dangi yok ta lai police dang nangzük.
La den alia police-isa iba ken o dak sendakba nung nisung 4 Police station-i jaoka asüngdangya. Parnokji Iloto Achumi (19), Rachel Swu (41), Manjeet Meitie (40) aser Joel Merry nungertem lir. Parnok ajak dak ozüngi melaba ama temerenshi agütsüogo, ta police-isa metetdaktsü.
Nisungtemi kuli tejangja memeteti mesüra mejangjai COVID-19 dak sendakba osangtem meprokshitsü metetdaktsür, ta Dimapur Police-isa ashi.