Dimapur nung ozüng alema sen sarur ishika apu

Dimapur, May 12 (TYO) : Dimapur Police, Zone – I kübok Anti Extortion Team(AET)-i May 7, 2016 nü New Market tesem nung GPRN/NSCN tenüng amer süngjanglijang ayokertem dang nungi ozüng alema sen saruya-a lia Naogaon, Assam nungi Idrish Ali’er jabaso Wahidul Islam apu. Pa den külemi pai saruteta aliba sen dena police-i pua ayu, ta Addl. Dy. Commissioner of Police/PRO Dimapur, Nagaland-i sangdong ka ajanga metetdaktsü.
Ano May 10, 2016 nü Dimapur Police, Zone II kübok Anti Extortion Team (AET)-i New Market tesem nungsa shishilemba mapa inaykaretem dang nungi ozüng alema sen sarur nisung ana apu. Tena ket nungi sen 10,100 ngutet. Tena rongnung ka Lt.Tohokhu’er jabaso NNC/FGN (N/A) telok nung ‘Leacy’, Kavishe Zhimomi aser ka Lotozu Sumi’er jabaso NNC/FGN (N/A) telok nung ‘Tatar’ David Sumi lir ta jangjaogo, ta sangdong nungsa shia lir.
Kasa sangdong ajanga, May 7, 2016 nüsa tatalokba balaka nung ano Diphupar Police Station nungi police temi mile 6 nung truck gari ka nguteta lir. Osang ajanga ashiba agi B/Regd No. AS01FC-5777 keta aliba gari ya auyar aoba lir aser auyartem anema Dillai Police Station nung case ka benoka lir. Iba gari ya May 12, 2016 nü Dillai Police Station nem agütsüogo, ta metetdaktsü.