Dimapur nung ozüng alema totzü meyoktepba tesemtem mita ao

Dimapur, June 27 (TYO) : Hombarnü National Food Security Act 2013 sayaba mapang, Dimapur aser Chumukedima kübok tesem trok nung ozüng alema totzü meyoktepba inyakyim putetogo.
Iba inyakyim nung PDS nungi kerosene totzü litre meyirjang aika tim mesüi amshiba putetogo.
ACAUT-i ashiba agi, inter state mapa inyakertemji Lal Mohan, Dinanath, Umesh, Srikanth aser Naval nungertem lir aser parnokji tongti ketdangsertemi dang masü saka bangdak department-ia teyari agüja nungit.
ACAUT züngsemtemi ozüng alema totzü meyoktepba tesemtem mita ao aser parnoki police aser district administration nema osang sangokja parnoka tesem tonga arua mitba mapa nung aden.
Gorapathi nung parnoki tesem asem tashi mita ao aser idak nungjagi kerosene litre meyirjang aika, oil tankers gari 3, zero solvents, kerosene den meyoktepba chemicals aser motor pumps 3 tashi ngutet.
Iba mapang SDO (Civil), Dimapur-i ashiba agi 2015 nung item tesemtem police aser district administration-i shibangtsü aser ozüng alema totzü meyoktepba atema FIR ka benok. Tanü district administration aser police-isa ozüng alema totzü meyoktepba tesem asemprongla shibangtsü.
Kuda Cold Storage anasa United village, 5th mile nunga kerosene litre 30,000 jungnüa tanks nung yua aliba putet aser iba tesem nungisa motor pump 2 aser oil tanker gari ka angu. Iba tesem ya Ajay Prasad aser Romeo nati ketdang asür ta angazük aser EAC, Chumukedima o Diphupar police-i teinyaktsü mapa ajak inyakba sülen tesem shibanga yutsüogo.
Iba sülen, ACAUT telok den police, EAC, Chumukedima aser Chumukedima lanurtemi Chumukedima nung Nagami petrol station semdang. Iba mapang petrol pump tesülen parnoki ozüng alema totzü meyoktepa mapa inyakba putet.
Iba tesem nungi kerosene, chemicals pongdang 16 aser motor pumps angu. Iba petrol pump nung mapa inyaker pezü apu aser parnokji police ket nung agütsü. Ano, petrol pump nung manager dang asüngdangya asüdang Tata parking tejaklen tesem ka nung kerosene, chemicals aser motor pumps yua aliba nangzük aser itemji apu.
Chumukedima lanurtemi iba petrol pump shibangjang ta takhangba agütsü aser parnok telongtet nung iba ama ozüng alema inyakba mapa meinyakdaktsütsü ta amokmerena metetdaktsü.
ACAUT-i Dimapur district administration aser police dang iba ken o hopta ka tsüngda bushisüngdangtsü aser bushitetba osangji yimjak nung metetdaktsütsü ayongzükogo.
ACAUT-isa bangdakpurtem dang Dimapur nung aser tangalen meyoktepba totzü ayokba tesem/petrol pumps tem bushitsü takhangba agütsü. Ketdangsertemi temulung asütsüsa bushisüngdangba mapa meinyakra ACAUT-i bushisüngdangtsü ta parnokisa metetdaktsüogo.
Iba mapa nung Naga yimten teloktem dena lir ta kuli sayur kechiyong iba inyakyim anepalur nisung ka NPG züngsem ta metetogo. Anosa, Naga yimten telok kati Nagame petrol pump kibur dang ‘2nd class business (petrol mixture)’ atema saru meshiba shidi ka nguogo, ta ACAUT-isa metetdaktsü.