Dimapur nung Peace Activists’ senden amener

Dimapur, May 14 (TYO) : Life Spring Corner, Dimapur nung tanü agi anogo ananübuba Peace Activists’ senden menogo aser iba mapang Manipur sorkari benokba bill asem- Protection of Manipur Peoples’ Bill, Manipur Land Revenue & Land Reforms Bill aser Manipur Shops establishments Bill benoka olemtep.
Manipur nungi peace activists-i “Issues from Manipur” ta ser onük benoka olemtepba nung Meitei nunger, Naga tsürtem, NGOs aser mission workers teloktem lemsar shisa lemsatepa liasü.
Olemtep nung Naga tsürtemi ashiba agi, bill asemji tribal nisungtem mesüra Hills Area Committee nunger dang masüngdangi Manipur Assembly nung agizük, anungji ibaji Linük Temzüng Arrla 371 (C) anema inyakba mapa ka lir aser “anti tribal” lir.
‘Protection of Manipur Peoples’ Bill’ nung inner line permits (ILP) mapa tenzükba ajanga Meitei aser tribal tem tsüngda mangatettep adok.
Tenemtsüng nung alirtemi tentetba joint action committee (JAC)-i tribal nisungtem den asüngdangya asü asübo, iba onük kanga tulu mekümi lila, ta arogo lennir katia tanü senden nung ashi.
Ao külen, Meitei nunger teloki ashiba agi, tenemtsüng nung alirtem aser tenem nung alirtem tsüngda mangatettepba aser mashilen meyipzükba ajanga bill asem nung ashishitep onüktem adok.
Bill asem benokba rongnung tasembubaji dang tasen lir aser Manipur Land Revenue & Land Reforms Bill ji Manipur ano state makümdang, 1960 küm Indian Parliament-i yangluba lir, ta Meitei nunger telokisa metetdaktsü.
Tanü senden nung Nagaland Post yimozülur, Geoffrey Yaden-i ‘Religious resources for peace work’ ta ser kaket ka sayatsü.
Iba kaket ya kaketzülur teneti yaritepa züluba lir aser tanü Geoffrey Yaden-i o jembidang, iba kaket nung tamangba yimsü tangatetba aser tesayuba balala indang shia lir aser iba kaket ajanga loktiliba nung yimjung aser teputep adoktsü tangatetba agütsütsü, ta ashi.