Dimapur nung Phom Monyiu Benjong among

Dimapur, April 04 (TYO) : Phom nunger benjong tulutiba Monyiü benjongmong sentong tuluka Mongolbar nü Dimapur nunga Signal Phom Union-i ayongzüka mongogo. Iba benjongmong sentong nung tongti tesemdanger, MLA Wb.S.Pangnyu Phom aser tetushi tejaoker Wb.G.Hukugha Sema IRS liasü.
Iba sentong nung benjongmonger ayongzüka jembidang, Longleng district ya yimjung lima ka lir, kechiyong Phom nunger rongnung likalilem aser yimten ken o tsütsü kecha mangatettep aser meputep mali, anungji kasa tangatetba nung Nagaland nung Naga nungertem ajak rongnung libaliruteptsüla ta Wb. S. Pangnyu Phom-i metetdaktsü.
Monyiü benjong ya Phom nunger asoshi küm tasen benjong ka lir aser iba benjong mapang küm piyong asürtem nem akümtsübu agüja parnok tanüla denji akümlirtem pilar ta paisa Monyiü benjong amongba tetezü ka metetdaktsü.
MLA Pangnyu-isa benjongbentsü amongba ya chiajema pelatepba kisüng masü saka sobaliba tajung wazüka benshiba aser nisungtem rongnung putepa alitsü atema tesensaktep akangshiba mapang ka asütsüla ta ashi. Nagaland asoshi Dimapur ya tanüdangtsü amai ka lir, iba yimti nung Naga nunger ajak alir, anungji Naga nunger longjemtsü aser putepa alitsüji Dimapur nungi tenzüktsüla ta paisa ayongzük.
Iba kasa benjongmong sentong nung tetushi tejaoker, Wb.G.Hukughaia Naga nungertem dang tangar dak nendaka melii peisasa pei taküm liteta aotsü ajungshi.
Iba sentong nuing Monyiü benjong tetezü taoba Parliamentary Secretary, Wb. H.Nyemli Phomi ashi aser tarur pelaa agizükba o Phom Signal Union nung tir Wb.N.T.Thamlong Phom-i metetdaktsü. Iba sentong nung shilem agir aser tarurtem ajak dang pelaba o Wb.B.Tushak Phomi metetdaktsü aser Dimapur nung Signal Angami yimtak Phom nunger mepu ka küma litettsüsa aniba asoshi tamalen pur tsüraburtem nem tenüngsang agütsü aser temoatsü meshia Signal Phom Baptist arogo nung sannüker Wb.L.Dauyan Phom-i anir Tsüngrem tenzükertemi sarasademtsü.
Iba benjongmong nung lanurtem aser taintem telok balalai ken aten aser yartsüngsang nung shilem agia liasü. Iba sentong nung telok benjong chiyongba mapang liasü.