Dimapur nung plastic amshia gari lenmang yanglutsü

Dimapur, December 22 (TYO): Dimapur Municipal Council (DMC), Living for Environment (LIFE) aser Nagaland Pollution Control Board (NPCB) tem külemi longjemer gari lenmang yanglutsü atema mapatong ka tenzükogo.
Parnoki ‘recycled plastic waste’ amshia gari lenmangtemji yanglutsü.
“Polymer bitumen road” indang project ji tendanga inyaktsü aser iba nung poly vinyl chloride (PVC) dak alaka plastic endokenratem amshia gari lenmangtem yanglutsü, ta NPCB ketdangser kati ashi.
Iba mapatong nung tamasa plastic endokenratem tila küma lensatsü aser iba sülen molutsü. Plastic moluba sülen bitumen den meyokteptsü, ta ketdangserisa ashi.
Iba temeyoktep ya mapang talangka alir aser iba jagi gari lenmang talangka meraksar. Iba mapatong ya mezüng DMC office complex nung inyaktsü, ta paisa shisem.
Taoba mapang iba mapatong ya NPCB office Dimapur nung inyakdang aser takok ngua liasü, ta paisa metetdaktsü.
Iba mapatong takok ngura DMC-i colony kar den yaritepa plastic endokenra shimdangba mapa inyaktsü aser ibaji gari lenmang yangludang amshitsü, ta DMC, Administrator, Moa Sangtam-ia ashi.
Iba mapatong yagi gari lenmang tajung agütsüba dang masü saka non-biodegradable plastic jana timi amshitettsü, ta paisa shisem.