Dimapur nung prangpong yangludak ka makdok

Dimapur, June 3 (TYO): Osang tejangja ka angazükba sülen HQ IGAR (North) kübok 41 Assam Rifles-i June 3, 2017 nü Dimapur kübok Lhomithi, Signal Basti nung prangpong injang yangludak ka mita ao.
Iba mapang Assam Rifles sepaitemi arms fabrication unit ji makdok aser nisung ka apu. Paji Lhomithi nung alir arishi küm 29 tain Kiyoka Yepthomi ta jangjaogo, ta PRO, IGAR (North), Lt Col Amitabh Sharma-i sangdong ka nung metetdaktsü.
Kiyoka-i prangpong yangluba, shibelenba aser telungpur dang ayokba nangzükogo. Pa ket nungi 9 mm Carbine Machine Gun den magazine, Pt 22 mm Pistol ka den magazine, semi fabricated 9 mm Pistol, Pt 22 mm Pistol, G-4 Assault type Rifle aser tanga osettem aika ngutetogo, ta sangdong nungsa shia lir.
Pa den külemi apuba osettemji Sub Urban Police Station, Dimapur ket nung agütsüogo, ta PRO, IGAR (North) sangdong nungsa metetdaktsü.