Dimapur nung PWD Office complex tasen semzükogo

December 12, 2017 nü Housing Parliamentary Secretary, Er. Levi Rengma-i Dimapur nung PWD office complex tasen ka semzüktsüba noksa nung angur. 

Dimapur, December 13 (TYO): December 12, 2017 nü Housing Parliamentary Secretary, Er. Levi Rengma-i Dimapur nung PWD office complex tasen semzüktsüogo.
Iba sentong nung jembidang pai, office building tasen yangluba ya PWD office ajak kilem ka kübok amenoktsü atema lir, aser ibaji ajanga maparen takok ngua nüburtem tajungtiba nung tenzüktsü atema lir, ta metetdaktsü.
Paisa, “Dimapur nung posting aliba ketdangsertem aser staff temji kanga tia taka, kechiyong ajaki Kohima mesüra Dimapur nung ang inyakner, anungji Dimapur nung mapa akoba ya kanga tia taka. Sorkari office building tasen agutsüogo anungji ajaki kanga meranga inyaktsüla aser nüburtem tajungtiba nung tenzüktsüla,” ta ajungshi.
Iba sentong nung UBCANEI Executive secretary, Rev L. Hevoto Awomi-i sarasadema liasü aser Chief Engineer, PWD (Housing) Er. J. Talimeren Aier-i Technical report agütsü.
Kasa sentong nung Chief Engineer, PWD (R&B) Er. Krosu Rhetsuo-ia o tatsüka jembi aser Addl. Chief Engineer, PWD (Housing) Er. H. Kahuto Sumi-i tepela o jembia liasü.
Iba sentong ya Commissioner & Secretary (W&H), Bendangkokba IAS leniba nung agia liasü.