Dimapur nung ring well mürekdang nisung ka asü

Dimapur, Mongputeni/Oct. 09 (TYO): Anogo asem tsüngta ano Darogapathar nung Hokulbarnü ring well ka mürekdang methane gas soak südi ta temulung melemteti nisung ka süogo.

Nisungba ya Naharbari nung alir arishi küm 35 tain Dibyajyoti ta jangjatetogo. Lendong ana ataloka nisung asem takum samaba sülen District Disaster Management Authority (DDMA) ajanga nüburtem dang takum kumzüktsü mera tabensa magi tzübo telungi maitsü metetdaktsüogo.

Iba amala tzübo nung tangola tamajung alitsü akok mesüra oxygen levels kanga ajema alitsü, koba ajanga nisung süchia aotsü mesüra asütsü, ta ketdangsür temi ashi.

Ketdangsür temi iba ama lendong aketba mapa inyaktsü ya trained personnel nem yutsütsü ayongzükogo. Tzübo telung nung iba ama lendong timtem ajurur alirtem tapi agi kumzüktsü memerangtsüla, kechiaser iba ama inyakba ajanga ano nisung tali ang takum agitsü, anungji emergency responders nem osang agütsütsüla, ta ashi.

SDRF rescue team commander Havildar Yevuxu Swu-i ashiba agi, iba lendong ajuruba osang ya parnok dangi anüngdang 11:10 ako meta aru aser parnok iba tesem 11:40 ako meta tonga oa tasümang ya anüngdang 12:20 ako meta agitet.

Ring well mürektsü atema nisung asem telungi ai aser Dibyajyoti ya aket tenzük aser nisung memeteti akum. Külemi inyaker ka tzübo telungi aitsü merang saka tango mesashiteti meyiper adok ta ashir.

Police temi teinyaktsü mapa inyakba sülen tasümang ya kinunger nem agütsüogo.

October 6 nüa Oriental Colony, Dimapur nung tzübo ka mürekdang nisung ana asü.