Dimapur nung ‘Sanitation Campaign’ tenzük

Dimapur, June 23 (TYO): Hokolbarnü Dimapur nung Soil & Water Conservation Department-i teyari agüja Group for Environment Management and Services (GEMS) ta ser mulungtet telok kati “Sanitation Campaign” ka tenzük.
Iba sentong ya Sangpangtu colony, United North Block – B, Burma Camp, Dimapur nung tenzük aser tongti tesemdangerji Soil & Water Conservation Director, Imkongneken Ao liasü.
Sentong nung GEMS tir Impa Longkumer, Ministry of Micro, Small & Medium Enterprises, Govt. of India Deputy Director Er. Tali Longchar aser Soil & Water Conservation Assistant Engineer Er. Imtiwati Jamir nungertem aden aser parnoki Sangpangtu colony nung alirtem dang solid waste management indang tesayuba balala lemsatep.
S&WC Director, Imkongneken Ao ya solid waste management nung aika ajangshia aruba nisung ka lir aser Nagaland nung vermicomposting tenzüker rongnung pa da lir. Tanü sentong nung pai jana timi anepalutsü indang tayongzükba agütsü.
Dimapur ama jila nung Municipal (urban) solid waste (MSW) ji ali nung endoker saka iba inyakyim ya tzümopung atema majung lir. Anungji, asenoki tzümopung memenentsü atema jana mashi meindoktsüla, ta pai ashi.
Tanü-asüng amshiba technology maparen rongnung jana endoktsü atema ‘vermicomposting’ ya ka lir aser iba ajanga aseni endokba janaji senti kümdaktsütsü akok. Anungji, asenoki vermicomposting technology amshitsüla ta paisa ayongzük.
Tanü Director, Imkongneken-i vermicomposting technology indang temetettsü metetdaktsü aser Soil Conservation Assistant, Pango-ia vermicomposting indang live demonstration sayu.
Sentong nungsa Group for Environment Management and Services (GEMS)-i kiyonger nem organic smart bins aser vermicompost mol lema agütsü.