Dimapur nung “Sanjeevani Polyclinic & Diagnostic Centre” lapok

Hokolbarnü PWD (R&B) Minister, Vikheho Swu-i Sanjeevani Polyclinic & Diagnostic Centre lapoktsüdang agiba noksa.

Dimapur, June 10 (TYO) : Dimapur nung tan mezüngbuba atema “Sanjeevani Polyclinic & Diagnostic Centre” ta ser clinic ka lapokogo aser iba nung temang anepaluba den sarasadem teyari angutsü.

Iba clinic ya Ram Janaki Hr. Secondary School, Dimapur anasa lir aser Hokolbarnü PWD (R&B) Minister, Vikheho Swu-i lapoktsü.

Clinic lapoktsüdang Vikheho-i iba clinic lapoker telok nem tenüngsang agütsü aser ano sensakertem angati temang anepalu reprangba atema pelaba metetdaktsü.

Centre nung CEO, Rakesh Jain-i ashiba agi, tang iba centre nung Dr. Sanjib Chowdhury, MBBS (General Physician) aser Dr. Azidi Zeliang, MD (Child Specialist) nati anepalur aser tarutsü nung ano doctor ana züngsemba den visiting specialists alitsü.

Sanjeevani Polyclinic & Diagnostic Centre nung teyari balaka agütsübaji Grace Gift Healing Centre nungi Dr. Tiasashi Aier-i shilem agiba lir. Pa ya sarasademer nisung ka aser shirang aneptsütsü sempet lir aser medical team nung pa nem ghonda 2-3 shi mapang lemzüktsür.

Clinic ajanga ita shia anogo ka sensakertem aser tangar memenepba tetsürtem atema angati check up alitsü.