Dimapur nung sannükertemi ACAUT nungiter

Dimapur, Aug.05 (TYO) : Alima nung nisungtem asoshi renemba Tsüngremer nükjidong atalokdakja loktiliba ka yanglutsü asoshi kija aser telok shiaji shimteta lir, anungji tang ACAUT teloki Nagaland nung tashiyim agi saru saruba aser ochimashi mapatem anema ola adokbaji Tsüngremi tenyaba mapa nung shilem agiba ka asütsü ta tanü sangdong ka ajanga Dimapur Area Ao Baptist Pastors’ Fellowship (DAABPF)-i metetdaktsüogo.
Naga nungertemi Khristan tajung ka ama, ACAUT teloki inyakba mapa ya manemi peisasa pei taküm meyipa reprangdanger, kechiba ACAUT telok ya tenzüktsüsa aküm ta shisadangtsüla ta parnokisa metetdaktsü.
Aiben asenokang temeshi ama sayunü dang, asenoki asenok tashimait mangur aser tangarang aitsür, iba jagi shitakba tebilemtsü dak mekongshir aser ochiba akoksar anener. Naga nunger ajak asoshi ibai ochi jembitsüba mapang lir, iba jagi dang Tsüngrem nükjidong tongtettsü ta sannükertemisa metetdaktsü.
Naga nunger loktliba ya Tsüngremi mulungba nung sobaliba metetba aser tangatetba nung nisung shia meraketa litettsüsa yanglutsü asoshi Nagaland nung alir senso ajaki ACAUT mapa ya nungitdaktsüner ta Dimapur nung Aor sannükertemisa nübortem dang mepishia metetdaktsü.
Arogo purtem ajaki ACAUT lenirtem asoshi sarasademtsütsü mepishir ta parnokisa tayongzükba ka metetdaktsü.