Dimapur nung senden reju tuluka asü tenzükogo

Dimapur, April 11 (TYO): Dimapur nung lokti senden tulu ayongayonga katettsüsa Ao Senso Telongjem Dimapur tenüng nung Dimapur Ao Lanur Telongjem (DALT)-i senden reju tuluka asü tenzükogo.
Iba arju ya tang ASTD-isa 1999 küm yanglua aliba den külemi dang medemtepa yangludagi aser taküm 2016 kümbosa renemtsü sentong lir. Iba arju tasazük ya metong nung feet 150 aser lenden nung ft 80 aser azüklen ali nungi tsüngbang tashi nung ft 23 shi asütsü. Iba arju ki telung nung ya nisung meyirijang anabo mentettsüsa menden alatsü tebilemba lir.
Ano, arju tasen tuluba ya teyangludak nung tang süa aliba arju tejenba yaa kanga junga yanglushitsü aser nisung noklang ka-ana atema senden ayongzükdangbo iba arju tilaba ya amshitettsüsa ASTD-i Air condition dena enoka yanglutsü sentong atongdagi.
Iba senden reju kimong ya bigha ter shi lir aser iba li ajunga ya küm  20 jakdang lenir Wb.S.Imtisüngit Jamir aser Wb.I.Nüngshizenba Longkumer nati tenla agütsüba lir. Iba kimong nung senden reju yanglutsü asoshi 1995 küm May ananü Wb.S.C.Jamiri long azüngtsü. Iba mapang pa Nagaland chief minister liasü.
Iba küm nung jagi tenzüka, ASTD-i iba kimong meküta longru agi atsü atsübang aser tang aliba arju ya yanglur külen, Nagaland angh liasüba Wb.O.P.Sharma nem 1999 küm May ka nü Moatsümong sentong ka nung semzükdaktsü.
Dimapur nung lokti tulu senden alidak kilong aser kima tesadem maliba ajanga küm ishika jakdang nungi ASTD-i tang aliba arju ki dang nungi tuluba ka yanglutsü jembitepa liasü saka senotsü makaba agi tebilemba mapa küma meinyakteti lia, küm ishika jakdang senden reju tuluba ka asütsü telemtetba agir külen, iba mapa inyaktsü asoshi ASTD-i Dimapur Ao Lanur Telongjem nem bendanga agütsü. Iba khuret agizüker külen yaküm 2015 küm DALT purtemi senotsü bushitsü atema ‘raffle’ ka adoka saya aser iba sentong nung Dimapur nung alir Ao yimtsüng telongjem ajaki shilem tajung agiba den Kohima aser tesem balala nung Aor lenirtemi yaritepba ajanga lanurtemi sen lakh 40 dak tema tajangzük ngutet. Iba senji amshia taküm January ita nung DABA sannüker nem sarasademdaktsür kisü mapa tenzükogo.
Tang tashi nung nisung aikati yaritepba ajanga alilen ajungketa yangluogo aser ki tesülen jara külen tuogo aser yakta yin tongshi azüngyonga aotsü renema lir. Iba maparen nung tang tashi nung senso kari longru (bricks), kari cement, kari ali atuba aser abenba gari aser kari senotsü nung ta yartitepba asoshi kanga pelaba osang ka DALT lenirtemi metetdaktsüogo. Iba ki ya sen crore ana shi agi renemtsü, anungji ano senotsü aser osettsüset aika nüngdaker asünungji, lokti aser kija kibongi ano maneni tenladaktsüner ta parnokisa mepishia metetdaktsüogo.
Iba arju ya renemer külenbo, Dimapur nung yimten aser lokti senden tulu dang masü saka kiyir benjong, asentenshi aser kentenmenü sentong tulu yangi ayongzüka litettsü. Iba arju anasa soruchiokdak ki alitsü aser tesem ajaklen tzü aser metsümeshidak tajung peria yanglua toktsütsü lanurtem tebilemba lir.
Tajung kaji, iba senden reju tesem ya Dimapur o Chumukedima na tsüngda tiyong nung aser bus station tasenba (ISBT) anasa aser gari anendak tesem peria dang lir. Ibai Dimapur nung Aor asoshi dang masü saka kin ajak asoshi nüngdak tesem tongtibang ka asütsü.
Tesülen, iba kimong nungsa tanurtem kazüdak ‘park, tzüwadak ‘swimming pool’ aser commercial complex dena yanglutsü sentong nung lir.