Dimapur nung shishilembar ka aser par kibong amokmerensang puogo

Dimapur, December 4 (TYO) : November 27, 2015 nü Dimapur Police-i Hekato Chophy (Khekato Chophy ta-a ajar) ta ser nisung ka apu. Pa ya Litsami yimer Shevito Chophy’er jabaso lir aser Doyapur, Dimapur nung telidak lir.

Dimapur nung local shishilembar tongtipang ka amokmerenba aser ozüng alema inyakba ken o nung aija Dimapur Police-i Hekato Chophy ji Tuensang jila nung apu, ta Dimapur Police sangdong ka nung metetdaktsü.

Hekato-i Naga Yimten telok nung züngsem ka tenüng amshia shishilembar dang nungi sen meshi aser pa den par kibong tepsettsü ta amokmeren. Iba ajanga shishilembar aser par kibong kanga shisabulu. Iba tatalokba ya shishilembar tentet den telok balalai aitsüogo aser parnoki police dang mapa inyaktsü takhangba agütsü, ta sangdong nungsa shia lir.

Police-i bushisüngdang tenzükba sülen tai tongloktsüsangji Tuensang nung aliba bushitet aser pa aputsü atema special team ka yok.

Pai Naga Yimten telok ka nung alir züngsem ka tenüng amshia iba mapa inyak aser tesüiba mapang nunga pa tashiyim agi sen saruba atema aija tepuokdak ayuba osang lir, ta Dimapur Police-isa ashi.

Pa bail nung chioker liasü aser tang police-i pa tanaben puogo. Tarutsü nung pai Nagaland nung tensa raksatsüsa mapa meinyakdaktsütsü atema National Security Act (NSA) kübok pa aitsüogo, ta parnokisa shisem.