Dimapur nung shishilembar ka ashioktsü

Dimapur, Mongputeni (October) 17 (TYO): Divisional Railway Manager (DRM)’er jabaso ta tiyazü jembia nisung kati Dimapur nung railway contractor ka ashioktsü.
Iba nisung jagi railway tender mapa nung yaritsü ta shia contractor dang nungi sen lakh 10 meshia agi.
Osang balala sangoktsüba sülen August 21, 2018 nü iba dak sendakba ken o ka benok aser Dimapur police-i bushisüngdanga aruba sülen Danapur, Patna nung aibelensangji apu, ta ADCP (Crime), Dimapur-i tanü metetdaktsü.
Iba nisungji Srivastav (35) lir aser pa tang West Mumbai nung telidak lir. October 8, 2018 nü Railway Protection Force-i apu aser October 9 nü pa Dimapur-i anir aruogo aser ken o benoker bushisüngdang südar.
Taküm küm tetenzüklen contractor jagi Ashutosh den ajurutep aser idangji railway tender bid system nung yaritsü pai ashi. Iba sülen Ashutosh-i contractor nem pa indang PAN card aser Aadhaar card aser sen lakh lakh indang cheque ka agütsü.
Iba sülen Ashutosh-isa contractor tenüng nung sen lakh 56 alangba tender bid pezü tashi email asü.
Iba sülen pai contractor dang North east tesem bottling plant tasen ka yanglutsü lir aser iba atema tender mapa inyaktsü atema sebn lakh 10 enokjang ta ashi.
Contractor-i senji agütsü, ajisüaka pai tera temulung melemi bilemba agi railway department nung mapa inyaker medemer kar den osang agitepdang pa dangi yokba tender papers ajakji taila liasü ta putet. Idangjisa pai police den ken o ka benok.