Dimapur nung Swachhata Hi Seva campaign tanabuba shilem tenzük

Dimapur, Mongputeni/October 02 (TYO): Mahatma Gandhi sor küm 150 ajungba anogomong nüngtem nung Bodhbarnü Nagaland PHED Minister, Jacob Zhimomi-i City Tower Juncture Dimapur nung Swachhata Hi Seva campaign tanabuba shilem tenzüktsüogo, ta ketdangsertem osang ka ajanga metetdaktsü.
Iba sentong nung jembidang Jacob Zhimomi-i, Plastic Shramdaan omen kübok Swachhata Hi Seva nükjidong ya nüburtemi shilem agiba ajanga single use plastic amshiba anendaktsütsü atema lir, ta metetdaktsü.
Iba ya Ato kilonser, Nardnra Modi leniba nung India sorkar mapatong ka lir, anungji nüburtemi akümli pitong iba mapatong nung shilem agitsüla, ta pai mepishia metetdaktsü.
Paisa shilem agir departments dang maparen balala nung densema iba campaign tashi itdaktsütsüla, ta ashi.
Jacob-isa, sorkari shishilembaba establishments dang plastic mamshitsü metetdakrtsba aser aibelenertem nem temerenshi agütsütsü sangdongba indang nenshia metetdaktsü.
Iba anogomong nung Dimapur Deputy Commissioner, Kevekha Kevin Zehol-i ketdangsüa shilem agirtemi plastic mamshitsü atema tenangzükba agia liasü.
Iba sentong ya Administrator DMC, Albert Ezung, NCS leniba nung agi.
Tesülen tetushi tejaokeri Mass Shramdaan tenzüktsü aser department balala nungi ketdangsertem aser staff tem, military/paramilitary, melungtet teloktem, lokti tentettem, school balala nungi kaketshirtem dokan kiburtem aser sensotemi Dimapur district tesem balala nung Mass Shramdaan nung shilem agia liasü.