Dimapur nung taila call centre ka putet; Nisung 22 apu

Dimapur, Rongjui (September) 24 (TYO): Dimapur police-i national highway nung taila call centre ka lapoka aliba puteta makdok aser nisung 20 apu.
Revenue officers ta shia America nunger sensotem külakoktsüba atema parnok dak tai tonglokja apu.
Osang tejangja angazükba sülen Dimapur police-i iba tesem mita aodang nisung 20 apu aser parnok rongnung tetsür 6 dena lir, ta ta Deputy Commissioner of Police (DCP), Dimapur Zone-II, Vishal (IPS)-i ashi.
Parnok rongnungi nisung 16 bo bail nung chiokogo aser tongti süa tai tonglokja alir par pezü tepuokdak lir, ta paisa ashi.
Par pezüji Amit Bhomick (25), Michael Tenzing (25), Shovick Bhuiyan (24) aser Bernard Angami (45) nungertem lir.
Iba ken o bushisüngdanga arudang Special Investigation Team (SIT)-i September 15, 2018 nü Kolkata nung Ajit Kumar Ray aser Anirban Gupta na apu. Tena ya tongti süa tai tonglokja alirtem lir aser tena Dimapur-i anir aruogo.
June 2018 nungi iba call centre lapoker mapa inyaka aru aser parnoki sen lakh 30-35 shi ka amshiogo.
Iba maparen nung tongtipang nisung aika densema lir aser iba jagi maneni bushisüngdang asütsü, ta DCP Vishal (IPS)-isa ashi.
Call centre operator temi parnok Internal Revenue Service (IRS) ketdangsertem ama America nunger dangi call asütsü aser sorkar nem taxes mesüra penalties matütsüba atema aputsü, tepuokdak ayutsü mesüra senchi achitsü ta amokmeren.
Iba sülen parnoki America nunger dang sen masü saka gift vouchers/itunes card alitsü atema jembishinü asü. Parnoki nisungtem dang gift voucher indang 16-digit number meshi aser ibaji India sen nung melenzük.
Lanurtemi mapa bushidang tamasa company indang osang tejangja metettsü merangtsüla, kechiyong lanur aika iba ama taila call centres ajanga ashioktsür, ta DCP Vishal-isa metetdaktsü.