Dimapur nung taila sen & mozü shibelenertem apu

Dimapur, November 20 (TYO) : November 18, 2015 nü Zone-I kübok Dimapur Police-i taila sen shibelener nisung ka apu.

Iba nisung ya Samjiuram yimer Chali Zeliang’er jabaso Changlu Zeliang ta jangjaogo.

Iba nisung ya Blue Hill Station, Dimapur nung apu aser pa ket nungi sen 55,000 Fake Indian Currency Note (FICN) bena aliba angu ta Addl. Dy. Commissioner of Police/PRO Dimapur-i sangdong ka nung metetdaktsü.

Ano, November 20 nü Dimapur Police-i Vidima yimtsüng anasa tsümar tasümang ka angu. Iba nisung ya arishi küm 35-40 tetsüngda ka nung asütsü amai repranger aser langa kati pa yirutsüba ajanga asü asütsü atema temulung melemi bilemer, ta sangdong nungsa shia lir.

Iba mang ya District Hospital nung yua lir aser osang metetpelanürtemi Diphupar police station den tongteprateptsü akok.

November 18 nü police-i ozüng alema mozü shibelener tetsür ka apu aser la ket nungi spasmo proxyvon süngjang 1,354 aser Nitrosun süngjang 20 bena liasü.

Iba tetsürla ya asür Papul kinungtsü Tsunong Yimchunger ta jangjaogo aser la Drugs & Cosmetic Act nung aija bushisüngdang tenzükogo, ta Dimapur Police sangdong nungsa metetdaktsü.