Dimapur nung tang mezüng Big Bazaar lapokogo

East fbb & Big Bazaar CEO, Manish Agarwal-i kiojen kibur, Nibu Nagi den tepela lemsatepba noksa nung angur.

Dimapur, Aami 29 (TYO): Future Group indang Big bazaar ya India nung shishilembaba lennir ka lir. Rogonü/Friday Dimapur, Circular road telongtet nung aliba Nagi house nung Future Group-i mezüng store ka lapoktsüogo. Iba ya zünga North east nung iba store ya pongububa asütsü.
East fbb & Big bazaar CEO, Manish Agarwal-i osangbener den jambiba mapang pai ashiba agi, Nagaland nung nübur tenzüktsü atema Big Bazaar lapoktetbaji tepelatsü lir aser nübur nüngdakbatem aser taginübatem agütsütsü atema iba store yanglutsü. Onok indang store ya ‘one stop shopping destination’ asütsü aser ibaji ajanga nüburtem nüngdakba ajak peria agütsütsü.
Agarwal-i ashiba agi, iba store tasenba nung nüburtemi Big Bazaar indang mega properties talisa Sabse saste din, Wednesday bazaar, public holiday sale tem nung shilem agitettsü. Item sale ya India ajunga nung nüngtugu lir.
Big Bazaar store level 5buba nung grocery osettem, süngjanglijang, aonsotsü, kidang benshitsü atema osettem, personal grooming products, tetsür, tebur aser tanurtem atema abensüoshi & footwear tasen, luggage , toys aser oset talila tem angutsü.
Agarwal-isa ashiba agi, Future Group-i Kohima densema northeast nung store tem lapoktsü atema inyakdar.
Kiojen kibur, Nibu Nagi-i Dimapur nung iba store amenoktsü atema mepishi aser aji agizükba atema pai Future Group nem tenüngsang agüja liasü. Nagi-i ashiba agi, Big Bazaar lapokba ya ajangzüktsü atema dang masü, saka lanurtem nem employment maongka agütsütsü atema lir.