Dimapur nung tanurtemi tenük zübanger angur

Dimapur, July 13 (TYO) : Nisung dak aketba tekolok ya tekolak achijilen, abenlenlen aser tiyongtsü nung ta tesem asemsü nung lir saka asenoki ajakji masü saka külen aliba tekolok dang teraka amshir, iba jagi tangar memeneper ta tanü Mid Brain Masters sentong ka Dimapur nung lapokba mapang jembidang, Malaysia nungi aruba Mid Brain Masters nung Director Y.M.Wongi metetdaktsü.

Mid Brain Masters (MBM)sentong ya Malaysia nung amenoker alima tesem balala nung tangazükba agütsür aser Nagaland asoshi mezüngbuba Dimapur nung bener aruagi Insem-Genius Masters tenüng nung Duncan basti (H.No.131 Annex) nung lapoka lir.

Iba Mid Brain sentong ya ajanga talisa tanurtem arishi küm 7 nungi 15 tashi purtem dak aketba tekolok achiji aser abelen ajak renloka amshitettsüsa yarir. Iba sayuyim nung tanurtem temang arakzüka peladaktsüba den ano parnok tenük zübanger külen parnok kolok amshia mapa tapu balala inyakdaktsür, iba jagi tanurtemi parnok tenük agi masü tekolok agi ngua inyaktetter.

Iba MBM sayuba ajanga tanurtem kolok chiradaktsür aser tali aroka shisadangtsü asoshi tashi tasen ka agütsür. Iba jagi shisatsü tasen renloker aser tangazükba aser tazüngbaren nung karadaktsür ta Wb.Wongisa metetdaktsü.

Tanü iba sentong nung adenertem pelaa agizüka Insem-Genius Masters, Dimapur nung Director, Achila Ozükümi jembi aser Indian International Master Trainer, Rajesh Agarwal menden liasü.

Iba MBM training sentong ya tasenpurtem asoshi July 19, 2015 nungi tenzüktsü, anungji tejangrartemi parnok ketdangpurtem mobile number 9774020476 aser 8794950551 ajanga tongtepratsü akoktsü.