Dimapur nung tashiyim agi sen sarurtem apu Tenla KiMA nungi gari auyar aotsü meranger ka apu

Dimapur, October 12 (TYO) : October 12, 2015 nü Dimapur Police-i Padampukhuri nung truck gari anishirtem dang nungi ozüng alema sen sarur ka apu.
Iba nisung ya Sultan Ali’er jabaso Swahidul Islam ta jangjaogo aser pai GPRN/NSCN tenüng nungi tashiyim agi sen saru. Pa ket nungi Imphal Sand Suppliers Association indang tax coupons ngutetogo aser maneni bushisüngdangtsü atema pa anema ken o ka benokogo, ta Addl. Dy. Commissioner of Police/PRO, Dimapur-i sangdong ka nung metetdaktsü.
Kasa anogo nungsa Dimapur Police Zone-I kübok Anti-Extortion Team-i New market tesem nung nisung ka apu.
Iba nisungji NSCN/GPRN (IM) nung ‘Rajapeyu’ Khuvishe Achumi ta jangjaogo. Pa ket nungi sen ngutetogo aser pa anema ken o ka benokogo.
October 3, 2015 nü Burma Camp Dimapur nungi Bolero Pick-up gari ka samaba ken o bushisüngdanga arur Dimapur Police-i October 7 nü iba ken o nung nisung asem dak tai tonglokja puogo.
Par asemji Ghukato Zhimo, Tokugha Sumi aser Ikavi Sumi nungertem lir ta jangjaogo aser maneni gariji bushidar, ta Dimapur Police sangdong nungsa metetdaktsü.
Ano, October 11 nü Shikato Achumi ta ser nisung kati Ao Baptist Arogo Padampukhuri tenla ki kima nungi gari ka auyar aotsü merangdang public-i apu.
Shikato ya Hovuto Achumi’er jabaso lir aser pa ya Padampukhuri nung telidak lir ta jangjaogo. Deobar tekülem sentep agiba mapang pai gariji auyar aotsü merang aser pa ket nungi gari sapi kar ngutetogo, ta police-isa ashi.
Deobar nü Jain Mandir gate anasa Kalibari lenmang nung arishi küm 45-50 shi tain tsümar ka tasümang angu, ta sangdong nungsa shia lir.
Iba nisung dak bangsemo keta liasü aser sepaitem tola den half ka sema liasü. Pa mang nung zübo kecha mangu aser pa talidak malir ka asütsü amai temulung melemi bilemer. Tasümangji District Hospital morgue nung yua lir, ta Addl. Dy. Commissioner of Police/PRO sangdong nungsa shia lir.
Ano, Serhuja colony, Chumukedima nunga tsümar ka tasümang angu. Pa mang nung zübo kecha maliasü aser District Hospital morgue nung yua lir, ta sangdong nungsa shisem.