Dimapur, January 12 (TYO) : Yaküm küm December 14 nü Dimapur nung Hotel kibur ka tenüng agi Ritika Mehta khasetba maparen nung bangdak nung alirtemi asür kinungertem nem ochiobendang agütsütsüla ta tezüluba nung agütsüogo.
“Ozü tsürabur khasetba maparen nung ken o jangja-mejangjaka jembiba aser bangdak nung alirtemi telangzüba junga magütsüba agi kütsü khasetba dak aketba ken o nung kodanga ochiobendang mangutsü südi ta tali shisabolua bilemer, ” ta kinungertemi bangdak nung alirtem dangi züluba shidi nung metetdaktsü.
Asür Ritika Mehta kinungertemi ochiobendang meshia züluba shidiji Nagaland State Home Minister, DGP, Dimapur DC, Dimapur Commissioner of Police, DCP Crime, Naga Mothers’ Association, Naga Council Dimapur, Nagaland Alliance for Children & Women Rights, Naga Women Hoho, Nagaland Hotel and Restaurant Association aser Women Cell East Police Station-tem nem agüja lir.
“Police-ibo onok dang nisung khasetba maparen nung temulung melemi bilemba nisung karbo meteta lir ta ashi, ajisüaka item temulung melemi bilemertem dang nungi temetettsütem agizüka teinyaktsü inyaka aotsü asoshi mapang talangka agitsüa akok ta shisabolua bilemer,” ta parnokisa ashi.
Kinungertemi ashiba agi, la dak akhaba sülen Ritika-i lasasa autorickshaw ka nung anasatiba mozü ki kati ao, ajisüaka iba mozü kidangji la nem ‘first aid’-a magütsü aser mereprang, iba jagi pa tanga mozü ki kati aodang lenmang nung minute 15 agi aser iba sülenbo la sür dang mozü ki atong.
La taküm alidanga Ritika taküm lendong nung liasü, anungji lai East Dimapur Police station nung FIR aiben agüja liasü. Kinungertemisa ashiba agi, mejangjatetba nisungtemi parnok dang phone ajanga parnok taliba ki aser Dimapur toktsür yakta aotsüla ta amokmerena liasü.
Nisung khasetba maparen nung mapang talangka ochi obendang magütsütet menuba ajanga asür Ritika chirnurtem kaketrejuia mouteti tim atemer. ” Ozü kibong akaba ajunga samaogo aser onoki kecha maginer saka ojala khasetba maparen nung ochi obendang aginer. Ozü temeim ojala süogo aser tang onok chirnurtem kaketrejuia moutet akoksatsüba lir, kechiyong nisung tepseterji shibaar memeteti dang küma odagi,” ta asür Ritika’er kinungertemi metetdaktsü.
Ano, tanurtemi tebu taküm dena lendong nung lir ta shisaboluba ka metetdaktsü.
” Kütsü khasetertemi onok dang kechiba kibong mesütsü mapa inyaker tetsür ka aser tetsü ka khasettsüsa aküm aser nisung tepsetba maparen nung shirnok dena lir, itemjibo ashitsü tim, iba elangzübaji onoki aginer,” ta par kinungertemisa metetdaktsü.
Parnok timtem aser shisabolu mapang lokti tentettem, police aser bangdak nung alirtemi yaritepba asoshi pelaba metetdaktsü dang, ano onok tarutsü anogotem aser taküm asoshi shisabolua bilemer ta parnokisa metetdaktsü.
” Kütsü, shiba Dimapur nung senso tajung ka liasü, la ya lokti asoshi tenzüker aser business meranga inyakba tetsür ka liasü, ajisüaka la mapa inyakdak tonga aruagi la khasetba jagi Dimapur nung alir kin tilatem asoshi shisabolutsüka bilemtsüsa atalokogo ,” ta kinungertemisa metetdaktsü.
Ritika khasetbaji Nagaland nung tetsür dak aketba jakla tajung aser Nagaland tejakleni aoba sobaliba aser Northeast nung tetsürtemi tongti shilem agiba senmang tajungtem tepsetba den kasa asütsü ta parnokisa metetdaktsü.
Asür Ritika kinungertemi Nagaland nung lokti tentettem danga la teseptba maparen nung ochiobendang angutsüsa yaritepdaktsüner ra mepishia metetdaktsüogo.
You must be logged in to post a comment Login