Dimapur nung tetsür shishilembar ka kahset

Dimapur, December 14 (TYO) : Hombar aonung 6:00 ako meta Dimapur kübok Church road nung mejangjatetba nisung anati tetsür shishilembar ka kahset.
Iba nisung ya Apna Hotel kibur Ritika Mehta (48) liasü aser lar hotel telung nung la kahset.
Dimapur Police-i sangdong ka nung ashiba agi, asür Ritikaji counter nung mena lia, mejangjatetba nisung ana hotel telungi ait aser la dak injang kahloktsü.
Lendong atalokba sülen la Nikos hospital-i mezüng anir ao aser idak nungjagi ano Zion Hospital-i belen saka tasü bener aru ta doctor temi kuli agütsü.
Asür Ritika taküm lendong nung aliba atema ita ishika tejaklen police-i la asoshi bodyguard ka lemzükja liasü. Ajisüaka, lai bodyguard dang prangpong mabentsü tetuyuba agüja liasü, ta Dimapur Police sangdong nungsa shia lir.
Tanü lendong atalokba mapang asür Ritika indang bodyguard jia liasü aser pa den külemi staff temi nisungtem aputsü merang saka parnok telok nung jena otet. Iba tatalokba atema East Police Station, Dimapur nung ken o ka benokogo aser bodyguard-i pa lemzüktsüba mapa timi inyak asü masü ta asüba onük amsema bushisüngdang südar, ta sangdong nungsa metetdaktsü.
Lendong atalokba tesem nungi Police-i.32 pistol indang injang terep ka nguteta lir.
Iba tatalokba atema Dimapur Chamber of Commerce & Industries (DCCI)-i asüng (December 15) anepdang 8:00 ako nungi anüngdang 12:00 ako tashi Dimapur nung dokan ajak shibangtsü ta sangdong ka nung metetdaktsü.
Benjung mapang asübayong DCCI-i anogo tesadang ka dang shibangtsü telemtetba agi ta sangdong nungsa shia lir.
Ano, Nyamo Lotha Road Business Association (NLRBA)-ia sangdong ka nung, nisung kahsetba anema NLRBA telongtet nung dokan ajak shibangtsü ayongzükogo.
NLRBA-i iba inyakyim kukua aitsür aser ozüng amertemi tekaratiba nung aibelener pua merenshitsü mepishia metetdaktsür, ta sangdong nungsa shia lir.
Nagaland Medicine Dealers Association (NMDA)-ia sangdong ka nung Apna Hotel kibur Ritika Mehta kahsetba kukua aitsür ta metetdaktsüogo.
Tetsür shishilembar ka kahsetba aija aser tasür pusema NMDA-i December 15 anepdang 8:00 ako nungi anüngdang 12:00 ako tashi Dimapur nung pharmacy ajak shibangtsü, ta NMDA sangdong nungsa metetdaktsü.