Dimapur nung traffic ozüng tasen yanglur

Dimapur, July 6 (TYO) : Dimapur jila telongtet nung garitem tayongba nung senzütettsü asoshi July 20, 2015 nungi tsünglanglen agüja aliba traffic ozüng mapa küma tenzüktsü, ta Addl. Dy. Commissioner of Police/PRO Dimapur-i sangdong ka ajanga metetdaktsüogo.
Anepdang 8:00 ako nungi nikongtsütsü 5:00 ako tsüngda New Field Check Gate, Dellai Check Gate aser Khatkhati Check Gate nungi gari tulutem arutsü memelatsü.
Temalen agüja aliba mapang nung Chumukedima aser Purana Bazar nungi aruba gari tulutem New Dhansiri Bridge, Nagarjan Bridge, Rangapahar Crossing Bridge adena jila telongteti aittsü memelatsü.
Agüja aliba mapang jila telongtet nung mini/medium/ heavy vehicles nungi loading aser unloading memelatsü.
Tenokdangba nung passenger vehicles/ army aser CPMF convoys/ Govt. vehicles nungertem maiter.
Kodamasü timtem ajuruba atema sasa bilemer saka senzüsenbong ayongtsü nükjidong nung item ozüng tenzüktsü.