Dimapur nung Variety show, ‘Minkong Ola’ sentong agi

Dimapur, Metsüremi 11 (TYO): Minkong Ola, ta ser variety show sentong ka Metsüremi 10, 2018 nikongdang 6:00 ako nungi Abiogenesis Centre, Dimapur nung agi.
Sentong lenir, Yanpo Humtsoe-i sentong tenzüka tesentepertem pelaa agizük, iba sülen Along Imsong-i ken ana tena liasü.
Shilem agir tanabuba, Kohima nungi Saronthong Kikon-ia ken ana aten.
Iba sülen Guru Shiromong leniba nung Kuyingpong Culture Society-i sobaliba shilem balala- ken, jilushi aser yar tsüngsanga liasü.
Iba sentong nung Arenla Subong-i züluba kaket ‘Wings Of Passion’ sayaja liasü; iba kaket ya lai züluba jlushi pezü keta aliba kaket ka lir.
Iba sentong nung iba kaket nungi film ana- ‘Lichaba’s Daughter’ aser ‘Big Time Buddies’ video clippings sayu.
Iba sülen taoba mapang NEZCC Director aser Director Postal Service, Meghalaya, Som Kamei, IPS-i ‘Wings of Passion’ kaketji sayatsü.
Sentong nungsa kaket zülur, Arenla Subong, aser publisher den Heritage publishing house kibur, Dr. Asangla nati o tatsütsü jembia liasü.
Sabang nung tatemsa taoba mapang UDX nungi kentener, Akihito-i aniba Brownie Box teloki ken asem tena liasü.