Dimapur nung Ward-2 yimteni ACAUT nungiter

Dimapur, Sept.01 (TYO): Dimapur nung Ward-2 yimteni tawa ACAUT purtemi gari totzü nung kerosene meyokteper apuba mapatem indang kanga süoki ia jembiogo aser iba ama nübortem külaoktsüba mapa nung dena alirtem parnok ward nung melidaktsütsü atema telemtetba ka agiogo.
Gari totzü nung kerosene meyokteper ayokba ken o ya okadak tembanga aruba sülen, iba ama ochimashi mapa inyakertem shinga iba mepu nung melidaktsütsü, anungji odaktsütsü ta parnokisa telemtet takang ka agiogo.
Tarutsü nunga parnok mepu nung shingaia iba ama nübortem akoksatsüsa ochimashi mapa meinyaktsü atema nisung ajaki mita alitsüla ta Ward – 2 nung mendenbuba, Wb.Kevi Zakiesatoi metetdaktsü.
Iba ama ochimashi mapa putettsüsa ACAUT aser police department-i meranga inyakba asoshi parnokisa tenüngsang agütsü.
Dimapur nung Ward-2 Council-isa Nagaland nungi  Armed Forces Special Powers Act agientsü atema takangba agüja inyakba nung NSF, DNSU aser lokti tentettem pu sema nokdaker ta parnokisa metetdaktsü.