Dimapur nung Women Police station aser police CCTV network lapok

Dimapur, November 4 (TYO): Mapang tatsüka tsüngda nung Dimapur police-i alizüng tulu ka tongtetogo aser ibaji Women Police station balaka lapokba aser Dimapur police CCTV network sayaba lir.
Hokolbarnü Nagaland Home minister, Y Patton-i Old SP’s office complex, Dimapur nung tetsür police station aser CCTV network sayatsü.
Dimapur jila kübok tesem balala nung CCTV 42 aser high definition cameras (night vision facility dena) 11 enokogo.
Women Police station balaka lapoktsüdang, Y. Patton-i ashiba agi, iba police station ajanga tetsür aser tanurtem dak sendakba ken o tem asoshi registration aser bushisüngdangba ketdangsübaren balaka asütsü.
Küm 10 dak tali East Police Station den sendakteper aliba Women Cell ka ajanga dang district ajunga atema tetsür aser tanur dak sendakba ken o tem repranga aruogo, ta paisa ashi.
Tetsür aikati Police Station-i mouner aser iba jagi ozüng alema inyakba tatalokba aika memetetdaktsüi dang süidaktsür. Ajisüaka, Dimapur nung All-Women Police Station ka lapokba ajanga, tarutsü anogotem nungbo tetsürtemi tarendakba melii ken o benoktsü imlar, ta Home Minister-isa ashi.
Ano, scientific teyari agia police-i mapa tajungba inyakba rongnung CCTV amshia Camera Surveillance System ya ka lir. Iba jagi Dimapur Police Commissionerate kübok CCTV tem enoktsü sentong atong aser Department ket nung senotsü peria meliaka, Dimapur kübok tesem balala nung CCTV Units enokogo aser itemji Internet Protocol ajanga Control Room ka nung sendaktepogo, ta Y. Patton-isa shisem.
CCTV temji internet ajanga aser Smart Phone tem nunga reprangtettsü. Anungji, iba ya ajanga public kümzüka ayuba mapa tashi itshitsü aser ozüng alema mapa inyakba ajema akümtsü, ta paisa metetdaktsü.
Sentong nung Commissioner of Police, Dimapur, Liremo Lotha-i tesentepertem pela agizükdang, women police station ya tetsür police temi dang ketdangsüa reprangtsü aser parnoki tetsür aser tanurtem dak sendakba ken o tem atema inyaktsü, ta metetdaktsü.
Tanü agiba sentong nung mendenji DCP Zone II,Dr. KPA IIyas, IPS liasü aser Nagaland DGP, LL Doungel, IPS-ia o tatsüka jembi.