Dimapur nung yi aika apu; beer aika raksaa intok

Dimapur, November 07 (TYO): November 04, 2015 nikongdang 1:00 ako meta osang ka lazükba sülen Excise Narcotic Cell Enforcement teloki Niuland Sub Division Dimapur kübok Ghotovi Village gate anasa Dumper aser Scorpio gari, Regd No. NL02L-8899 aser Regd No. NL06-2641 na nungi Rum pongdang 7668 aser can Beer pongdang 1585 puogo. Item yiji Lahorijan (Assam) nungi Zunheboto-i belenba mapang gari ana rongnungi gari ka steering Ghotovi yim gate anasa raksa.
Iba dak sentakba nung Ustar Ali’er jabaso Sumiruddin aser Phutovi’er jabaso Bovito Yeptho na puogo aser NLTP Act 1989 kübok temerenshi agütsüogo. Iba telok nung Kakiho IE leniba nung Shihai IE, B.Apong IE nunger den AIE ka, Head constable 2 aser Constable 9 liasü, ta Dy Comissioner of Excise (NC) Nagaland, Dimapur, Visedelie Mepfuo-i sangdong ka nung metetdaktsü.
Ano tanga sangdong ka nung, Army tem atema abenba beer (Kingfisher) pongdang bottle 9348 nisung ajemtsü atema majungbayong November 04 nü CSD Premises, Dimapur nung raksaa intokogo. Destruction Board züngsem nung Deputy Commissioner of Excise (Hq) Chairman, L. Wati Jamir, Inspector of Excise (CSD) Member Secretary, Area Manager (CSD) Member, Store Keeper (Gp-V) Member liasü, ta Deputy Commissioner of Excise (Hq) Nagaland Dimapur, L. Wati Jamir-i sangdong ka ajanga ashi.