Dimapur nung yi aser temesepba mozü jenti raksaa indok

Dimapur, February 05 (TYO): February 05, 2019 nü Excise Directorate Complex, Dimapur nung Excise Department nungi Narcotic Cell & Mobile Squad-i yi aser temesepba mozü jenti raksaa indokogo, ta tanü Dy. Commissioner of Excise Nagaland; Dimapur, Moarenba-i sangdong ka nung metetdaktsü.
Tanü raksaa indokba yi aser temesepba mozütem rongnung yi pongdang 8246, Ganja seret 525, Brown Sugar gram 18, Spasmo Proxyvon capsule 19,707, Nitrosun tablet 1893, Codeine Cough syrup pongdang 3200 aser Methamphetamine drugs 1000 liasü; item ajakji tesüiba küm ka tsüngda apubatem liasü.
Yi aser mozü jenjangji sen 27, 00,00/- shi asutsü. Item aibelen atema senchi achiba sen 8,07,500/- ji Govt. Treasury nem agutsüogo.
Yi aser mozü raksaa indokba sentong nung jembidang Commissioner of Excise, Tarep Imchen-i, Excise Enforcement sepaitem nübo ishikdang süaka timtem agia pei mapa kanga nendaka inyakogo, ta tenüngsang agütsüba den külemi maneni nendaka inyaktsü ayongzük.
Iba maparen ya Destruction Board-i ketdangsüa inyak aser sentong nung Commissioner of Excise, Tarep Imchen aser Ld. JMFC, Dimapur liasü.