Dimapur nung yim tasen akümtsü merangertem nokdang

Mongolbar anepdang Dimapur nung District administration aser police-temi DC Court lenjem anasa Naga nunger  Daldali Reserved Forest leni yim akümi aoertem nokdangba angur.

Dimapur, July 12 (TYO) : Tanep Mongolbar anepdang Dimapur nung Food & Civil Supply Directorate office anasa National Highway lendi nung Naga nunger yim tasen akümtsü pur noklang ana shi külen aser police külen  ta parnok tsüngda tera nungang lendong madoki anenogo.
Naga nunger kari Nagaland aser Assam na tsüngda akhidang Daldali Reserved Forest kübok aliba tesem ka nung yim akümtsü asoshi ali mesemteta lir aser tanep parnokji iba tesemlen jagi mapa inyaktsü ooya alidang Nagaland police-temi nokdangba ajanga parnok tsüngda khen mangatettep adok.
Idangji police-tem aika water canon gari dena bener  adenshi aser administration nungia dena lenirtemi aruagi yim tasen akümtsü purtem den mapang talangka agia jembir külen lendong madoki nübortemji senshidaktsü.
Tanep yangi police den atsütepba mapang, yim tasen akümtsü purtem rongnung kati ashiba agi, Daldali Reserved Forest kübok alushiji Naga nunger meyong, anungji iba li nungji tetsüng ajemoka mapa inyaktsübaji temeten lir.
Ajisüaka, Dimapur district administration nungi ketdangseri kati, tang Naga nungertemi yim akümtsü mesemteta aliba luji Naga nunger nem magidaktsütsü asoshi Assam government-i sepai aika yoka lir, anungji Naga nungertem lura, parnok jagi lendong agütsütsü . ibayongji onoki Naga nungertemji meyoki nokdanger ta ashi. Ibai onoki lendong mataloktsütsü asoshi nokdangba mapa ka lir ta Police lenir katia metetdaktsü.
Iba ali dak aketba ken o ya tang Supreme court nung tepdaka lir aser state sorkaria kanga süoki ia inyakdagi, anungji tang ama mapang ka nung Naga nungertemi timtem magütsütsüla ta administration nungi aruba ketdangser kati ashi.
Nagaland state government-ia Daldali ta ajaba tesemji Naga nunger li ta nokdaker, iba li ya  “Disturb Area Belt (DAB)” kübok masü ta kasa ketdangserisa ashi.
Iba tesem nung yim akümtsüba maparen nung taoba küm asem shi jakdang nungi Assam aser Nagaland na tsüngda kanga atsütepa arur aser Nagaland tsütsübo Naga nunger ka Assam police-i khasetogo.