Dimapur nungi nisung 1300 pei talidaki apusoa ogo

COVID-19 lockdown ajanga Dimapur nung anendaka alirtem tanü pei pei talidaki apusoa agiba noksa angur.(Dimapur, May 07, 2020).

Dimapur, May 7 (TYO): March 23, 2020 nungi linük ajunga shibangba ajanga Nagaland nunga nisung aika pei talidaki moutettsüsa timtem ajuruba sülen tanü nungi parnok aika pei pei district/yimtsüngi ogo.
Dimapur nunga State stadium nungi tanü nisung 1300 dak tema pei pei talidaki apusoa ao.
State sorkari tanü nungi tenzüker May 9, 2020 tashi Nagaland telongtet nung lisopurtem senzüsenbongtsü atema temelaba agüja lir.
Dimapur nung nisung noklang aika anenzüka lir aser tanep parnok pei pei talidaki aotsü atema state stadium nung adenshia liasü.
Bangdakpur ket nungi medical fitness certificate anguba sülen ang parnok apusoa odaktsü. Tanü ano nisung aika medical fitness certificate agizüktsü atema aruogo.
Tanü sorkar aser nija bus gari 48 nung nisung 1300 shi mener district headquarters aser sub-divisions kar atongtsü atema apusoa ao.
Tanü Dimapur nungi pei pei talidaki meyipa aoertem rongnung kaketshirtem, mapa inyakertem aser aayangertem dena liasü aser parnok senzüsenbongba ajak ya sorkari angati teyari agütsür.
Assam ajanga aoba bus garitem nem Nagaland sorkari police escorts lemzüktsü.