Dimapur Police Commisionerate tenzüker küm ka ajunger

Dimapur, April 14 (TYO) : Northeast nung Gauhati sülenbo  Police Commissionerate tenzükbaji tanabuba asütsüsa yaküm 2015 küm April 15 nü Dimapur nung Police Commissionerate tenzükba tanü küm ka jungogo.
Iba inyakyim yagi district nung akhidangbo SP tekolak ser liasüba Police Commissioner tekolak akümer aser pa kübok district ji  zones ana küma lemsar Dy. Commissioner’s of Police kaka nem reprdangdaktsür.
Tang Dimapur Commissionerate kübok sepai tulu tila ajak agi 1498 lir aser Police Out-post tasen Piphema, kukidolong, Chumukedima, Kuhuboto, Purana Bazar, Lingrijan aser Marwari-patti nung lapokogo. Ano Traffic cell ka Chumukedima nung lapokogo.
Dimapur Police Commissionerate tenzüker külen junga inyaktetba mapa kaji Dimapur yimti nung gari anenba aser taru tao timi azüoktetba mapa ya ka asütsü. Dimapur nung traffic maparen ya Dy.Commissioner of Police (Traffic) kübok traffic zone ana küma lemsar repranger aser parnoki gari tulu aser tila senzütsüba mapang aser yimya ajak timi latetja tazüokba ka kübok ayutsü kanga meranga inyakdagi.
Yimti nung police mapa tongtibang kaji ozüng raksaba mapa azüoktsüba ya lir aser iba mapa atemaji zone ana küma lemsar Dy. Commissioner’s of Police anati repranger. Parnok kübok police station balalai pei pei lemzükba tesem reprangba den külemi ano Anti-Extortion Team(AET) aser Anti-Vehicle Theft Squad (AVTS) telok tenteta pei pei mapa inyakdaktsüdagi.
Iba inyakyim tenzüker taoba 2015 küm kija nung Dimapur district kija nung ozüng raksaba mapa 1003 tashi pua ken o benoka liasü.
Item ozüng raksaba mapatem apuba rongnung yi apuba ken o (case) 142 aser ozüng raksaba mapa balala nung apur nisung ajak agi 1018 liasü. Iba mapang prangpong tapu balala 117, injang round 904, ganja seret 16,483, Heroin kg ka, tamachitsü mozü süngjang 92979 aser yi bottle 54,520 apu ta tanü Commissioner of Police, Dimapur nungi sangdongba osang ka nung metetdaktsü.
Kasa sangdong nungsa ashiba agi, yaküm 2015 kümsa auyaba gari 34 ngutet. Ano taküm 2016 küm Anti-Vehicle Theft Squad (AVTS) tenteter külen mapang tatsüka tsüngda  gari 14 aser two wheelers 15 auyaa bener aoba ngutetogo.
Item dakji alaka mapang magii sensosangertem den teti osang agiteptettsü asoshi  Dimapur  police Facebook aser Twitter lapoka lir. Iba maparen ajanga lanurtemi kanga junga shilem agidagi ta parnokisa ashi.
Ano, yimti kümzüka ayutsü asoshi tesem tesem nung süisüponger tangokba CCTV enoka lir.
Joko memenui prangpong license dena Dimapur police Commissionerate nungi agütsütsü renemdagi.
Tang tashi nung Dimapur police-tem maparen tapu balala nung takok ngua arubaji sorkar den nübortemi yaritepba ajanga lir, anungji ano maneni senso ajaki yaritepdaktsüner ta Dimapur Police Commissioner-isa pelaba ken o ka den temepishiba o ka metetdaktsüogo.