Dimapur Police Commissioner den tepila sentong agi

Dimapur, Mongputeni/October 28 (TYO): Hombarnü Commissioner of Police Limasunep Jamir, IPS den tepila sentong agiogo. Sentong nung o jembidang Limasunep-i, Dimapur ama tesem ka, kong ken o tila agi tulu küma moraa aoer iba amala jila ka timtem kecha melei tesunep nung toktsütetba atema pa pelashishia mapa toktsür, ta ashi.
Iba sentong ya CP Office nung agia liasü kong DC Dimapur Kevekha Kevin Zehol den ketdangsertem aser Dimapur kübok lokti tentet balala nung lenirtem dena liasü. Jamir-isa, lokti tentet balalai nongita yariba ajanga Dimapur nung temzüng ozüng shidak benoka inyaktetogo ta ashiba den yimjung nung alitsü atema nüburtem teyari aser tangatetba nüngdaker kechiyong sorkar aser police ya nüburtem asoshi inyakertem lir, ta ashi.
Pa tajangshiba indang jembidang pai ashiba agi, pai mapa belenzükba mapang Dimapur nung tensa kanga tebenja liasü saka tang pai toktsür aoba mapang nungbo jenjang balaka kümogo. Paisa, pa melenzükeri maneni lokti tentet balala teyari nung pei mapa tajungtiba nung inyaktettsü imlaba lemsatep.
Maneni Limasunep-isa lokti tentet balala dang pa inyakba mapang teyari agütsüba atema pelaba lemsatep.
Sentong nung DC Dimapur-i ojembiba mapang ashiba agi, Jamir-i pa mapa kanga junga inyakogo aser ken o ka tamajungba küma mao tsüngda pai iba ken o bentettsü asoshi asatetadoker liasü. Paisa, Limasunep nem mapa nung promotion anguba atema tenüngsang agütsü.
Maneni DC-i, police officer tem dang Tsüngremi parnok nem nongloktsüba mapa shidak inyaktsü asoshi ajungshiba den parnok ya timtem nung aliba nüburtem nem tekümzükba agütsütsü asoshi lir aser nüburtemi parnok dak rangketa repranger ta bilemtettsüla ta ashi.
Kasa mapang nung Office of the Public Prosecutor, Dimapur, Dimapur Bar Association, Naga Council Dimapur, Naga Women Hoho, Dimapur, Dimapur Urban Council Chairman Federation, Dimapur Chamber of Commerce and Industries, Hindu Samaj, Dimapur aser Muslim Council Dimapur nungi lenirtemi Commissioner dang pelaba lemsatepa liasü.
Limasunep Jamir küm anaser tesadang Dimapur Police Commissioner ama inyakogo aser pa IGP (Range) Kohima mapai ajungketogo.