Dimapur police-i gari auyar telok ka puogo

Dimapur, October 6 (TYO): October 5, 216 nü Dimapur Police-i nisung tepsetba aser gari auyaba ken o nung nisung asem pua lir.
Iba telok yagi October 5, 2016 nü Daboka, Assam nungi Nagaland-i parnok nüngdak arutsü atema Mahindra Pick-up gari ka hire asü. Aonung 7:00 ako nung Dimapur atongba sülen parnok rongnung nisung anati gari anisangji anir Seithekema tesemi ao aser parnoki sentong yanglur aliba tesem ka nung gari anisang dak kotari agi atsüngtsü merangdang pa tera yiru. Gari anisangi yangji gari toktsür jena oa iba tesem nung aliba ki kati atu aser police dang iba tatalokba ashi, ta Addl. Dy Commissioner of Police/PRO, Dimapur-i  sangdong ka ajanga metetdaktsü.
Police-i iba osang prokshi aser gariji nisung ana jagi anir Kohima-i tuya-a lia Chumukedima Checkgate nung apu. Iba sülen par telok nung tanishisang dang gari abeni arung ta mesür arua Pherima nung apu. Parnok tenüngtemji Rois Ali’er jabaso, Abdul Rahman (Ashiq) (Hojai, Assam), Sansu Uddin’er jabaso, Rohim Uddin (Hojai, Assam) aser Allaudin’er jabaso, Kobir Ahmed (Karimganj, Assam) nunger lir ta jangjaogo, ta sangdong nungsa shia lir.
Tenati gari anisangji tepseter gariji Kohima tongtsütetra Abdul Rahman (Ashiq)-i sen 50,000 agütsütsü nangzük, ta asüngdangyadang ashi.
Iba gari ya Manipur-i bener aotsü sentong liasü. Iba tatalokba dak sentakba nung ken o ka benokogo aser Diphupar Police Station ajanga bushisüngdangdar.