Dimapur Police-i gari, bike ngutet; Auer 2 apu

Dimapur, September 13 (TYO) : Explosive Rules, 2008 nung Rule 84 aser Chief Controller of Explosives ajanga sangdongba nung ajemdaker anogo 60 matongdang Diwali atema temporary fireworks license application agütsütsüla, ta Addl. Deputy Commissioner of Police/PRO, Dimapur-i sangdong ka nung metetdaktsü.
Tejangrartemi Commissioner of Police, Dimapur office nungi application forms meshitsü metetdaktsür, ta sangdong nungsa shia lir.
September 9, 2016 nü Diphupar Police Station nungi police temi Chumukedima nung aliba servicing station ka nung Bolero pick-up gari ka ngutet.
Iba gari nung Assam number zülua lir aser gari anishir jagi police-i gari mitba lazüker jena ao. Police-i gariji Diphupar Police Station nung yua lir, ta sangdong nung metetdaktsü.
Ano, September 10 nü Ikishe yimtsüng nung Bolero pick-up gari ka angu. Iba gari ya mejangjatetba nisungtemi toktsür aoba liasü aser anogo ishika ayuba sülen yimtsüng ketdangsertemi police nem osang sangoktsü.
Police-i gari osang tejangja bushitepa aodang gariji sorkar department ka indang ta bushitet aser iba gariji September 6, 2016 nü Dimapur nung samaba liasü.
Kasa anogo nungsa KTM bike (unregistered) ka Airport lenjem, Dimapur anasa angu. Iba bike ji Duncan Bosti, Dimapur nungi auyar aoba laisü, ta Dimapur Police sangdong nungsa metetdaktsü.
September 12, 2016 nü Dimapur Police-i nisung ana prangpong agi amokmerena auyaba atema tai tonglokja apu. Tenaji Zhekuto Swu’er jabaso Kughaho Swu (2nd Lieutenant NSCN/GPRN-IM) aser Chombemo Kithan’er jabaso Yiben Kithan ta jangjaogo.
Tenati Chumukedima nung dokan ka telungi atu aser prangpong agi tuiter sen 41000 meshir Dimapur leni zonal Taxi (NL-01-T-8538) gari ka nung jena ao.
Iba osang angazükba sülen police-i len tom nung mendanga ataa liasü aser Purana Bazaar nung tena apu. Tena ket nungi sen aser .32 pistol ka ngutet, ta Addl. Deputy Commissioner of Police/PRO, Dimapur sangdong nungsa metetdaktsü.