Dimapur Police-i garitem asoshi tetuyuba nenshia metetdaktsür ; Mejangjatetba tasümang ka lir; Train agi nisung ka menüngset; Nigeria nunger 2 apu

Dimapur, September 7 (TYO) : Dimapur Traffic Police-i sangdong ka nung garitem indang aina nung ‘films’ enoka aliba ajak agizüktsü atema tetuyuba agütsü.
Linük nung amshiba garitem ajak nung black films mesüra safety glasses, windshield (front & rear) aser side glasses ajak nung tanga materials meinoktsü atema Supreme Court-i tetuyuba agüja lir aser iba nung ajemdaker Dimapur Traffic Police-i gari 549 tashi nungi ‘black films’ agizüka endokogo, ta Addl. Dy Commissioner of Police/PRO, Dimapur-i sangdong ka nung metetdaktsü.
Maneni ozüng alema designated plates & beacon lights amshiba aser UR/AF display plates amshiba atema temerenshi alitsü. Ano, Hospital aser ambulance operator temi pei driver & technicians dang gari nung shiranger malidangbo sirens & emergency lights mamshitsü tetuyuba agüjang, ta Dimapur Police sangdong nungsa shia lir.
Sangdong nungsa ashiba agi, September 6, 2016 nü Maruti Van (AS-07 7441) gari kati Central Jail anasa 4th Mile area nung nisung ka dak atsük.
Lendong atalokba sülen gari anisang jagi teyirusangji CHISR Hospital nung anepalutsü atema anir saka pa idakji asü. Tang tashi nung tasür maitsü mejangjateter aser iba jagi tasümang Morgue nung yua lir, ta Dimapur Police sangdong nungsa metetdaktsü.
Iba dak sendakba nung ken o ka benokogo aser gari sota ayuba den driver pua lir. Iba dak sendakba nung osang tejangja metetpelanürtemi Officer in Charge, Traffic-II, +91 7085055029 den tongteprateptsü akok, ta sangdong nungsa ashi.
September 7, 2016 nü Kuda aser Thahekhu junction anasa train lenmang nung Changki nunger Chubanuken’er jabaso Aonenba Ao train agi menüngset, ta Dimapur police-isa metetdaktsü.
Iba lendong ya anepdang 6:00 ako meta atalok aser tasüsangji Nagaland Police züngsem ka liasü.
September 7, 2016 anogo nungsa Dimapur Police-i Nigeria nunger ana kulikaket tejangja melii Nagaland state telungi aittsü merangdang apu.
Tenaji Tobias Chizoba Anljunsl aser Raymond Chinenyeuba Newze na lir ta jangjaogo aser Foreigners Act kübok tena anema ken o ka benoka lir, ta Addl. Dy Commissioner of Police/PRO Dimapur sangdong nungsa metetdaktsü.