Dimapur police-i GPRN/NSCN züngsem ka apu

Dimapur, May 21 (TYO): Honibarnü Dimapur kübok Blue Hills tesem anasa police dak injang kahloktsür ka Dimapur police-i apu.
Iba nisungbaji GPRN/NSCN nung “Sgt Maj” Khehuto Yeptho lir aser pa ya Zeito Yeptho’er jabaso ta jangjaogo, ta police-i ashi.
Blue Hills tesem nung Khehuto-i prangpong bener senzüba anguba agi Police Assistance Booth nung aliba police temi pa sot. Ajisüaka, idangji pai anüng nung injang ana kahdok, iba sülen police aser IRB sepaitemi pa aputsü aodang pai parnok tsütsü prangpong  shir injang kahloktsü, ta Dimapur Police osang ka ajanga metetdaktsü.
Idangji police tem ka danga meyiru, saka anameta aliba auto driver ka dak tetsüng nung injang agi kahshi. Paji tang Dimapur Civil Hospital nung anepaludar, ta police-isa shisem.
Iba tatalokba sülen Khehuto Yeptho jena ao saka police aser IRB jawan temi pa arshia ao. Pa ki ka nung jenokba lazüker police-i iba tesem meketbang aser idangji pai ano jena aotsü merang, saka pa kilentzü aodak alangba sülen police-i pa apu.
Police-i pa ket nungi country-made .32 pistol ka aser lendong atalokba tesem nungi injang terep asem ngutetogo.