Dimapur Police-i mapa tamajung inyaker apu

Dimapur, Aami/June 21 (TYO): Tashiyim agi nisung apuba aser ayuaba ken o balala nung ajemdaker Dimapur Police ajanga June 20, 2021 nü nisung asem – arishi küm 29 tain NNC/FGN nung ‘Leacy’ Gihuka Jakhalu, arishi küm 34 tain NSCN (R) nung ‘2nd Lt.’ Khetoka Chophy aser arishi küm 31 tain NSCN (R) nung ‘Capt’ Tokato Awomi pua liasü.
Parnok yagi kanga kumdanga jila nung kisü-jensüba tesemtem mita aotsü aser mapa inyaker, contractor/thekedar tem mapa temer mapa inyakba tesem nungi aodang pua liasü.
Iba ama mapa tamajung inyakba mapang amshiba gari asem den bike ka pua liasü. Iba dak sendakba nung ken o ka East Police Station, Dimapur nung züluokogo.
Padumpukhuri area nung Ceasefire ground rules nung aibelena temelaba makai mobile camp ka NSCN (R) ajanga lapoka aliba Dimapur Police temi June 21, 2021 nü mita oa shibangtsü. Iba maparen nung district administration nungi ketdangsürtem aser GB tem dena liasü.