Dimapur police-i Nigeria nunger ka dena nisung külakoktsür 4 apu

“Four One Nine” scam nung tai tonglokja alirtem rongnung Nigeria nunger Chiazo Nwaneri (achiji nungi asembuba) den Dimapur Police ketdangsertem agiba noksa angur.

Dimapur, May 11 (TYO): “Nigerian scam”, “Four One Nine” mesüra “Get poor fast scheme” ta tenüng balala amshia senotsü nung külakoktsüba mapa inyaker telok ka Dimapur police-i puogo.
Iba telok nung tongti süa tai tonglokja alisangji Nigeria nunger ka lir aser pa den yariteper nisung asem police-i apu.
East Police Station nung tetsür kari, nisung kari parnok sen külakzüka agiba atema FIR asem benokba nung ajemdaker nisungtemji apu, ta DCP (Zone -1), Dimapur Police, Vilhousie Peseyie-i osangbener dang ashi.
Tetsür asemi FIR benokba nungji, ka dang nungi sen lakh 31.50, ka sen lakh 6.47 aser ka sen meyirjang 23 külakzüka agiba indang shia liasü.
Dimapur Police nungi Dinesh Gupta, IPS probationer (attached to East PS) aser Chopika Chophy, SI na Delhi nung anogo 16 amungba sülen tai tonglokja alir nisung pezüji apu. Parnok ajak Dimapur Police ket nung lir, ta Vilhousie Peseyie-isa metetdaktsü.
Par pezü rongnung, Nigeria nunger Chiazo Nwaneri (Jasper) o Chandan Kumar Choudary na Delhi nung aser Narender Singh Bisht o Laxma Karniyal na Uttarakhand nung apu.
Police-i Nwaneri ket nungi SIM cards 42, mobile handsets 6, ATM cards 9, internet devices 3, passbooks 3, cheque books 3, laptop ka, pen drives 3 aser sen 31,000 bena aliba apu.
Nwaneri-i English tenüngtem amshia taila facebook account noklang aika lapok aser takar ka ama sayu. Taila account tem amshia pai tetsürtem den talisa medemer yimteter chat asütsü tenzük. Facebook nung meteteper ita ana-asem süia orr pai tetsürtem ket nungi sen külakokja agitsü atema tasa balala atonga inyak, ta Dinesh Gupta, IPS-i osangbener dang ashi.
Nwaneri-i aiben Europe nunger takar ka ama sayu aser par facebook medemer nem Apple laptop, I-phone, hon senti osettem bener yoker ta ashi. Anogo ananü-asemnü lir külen, pa den yaritepertemi customs mesüra airport ketdangsertem ta shia phone ajanga sempet ji IG Airport, New Delhi tonga aruogo aser sempet agizüktsü atema sen nüngdaker ta ashi.
Nwaneri aser pa den yaritepertemi ‘clearance fee’, ‘custom fee’ mesüra ‘security clearance fee’ ta shia sen meyirjang nungi shir lakh tashi meshi. Parnoki bank indang account tem agüja, item nungji sen enoktsütsü ashi aser ibaji tashi angaa tetsürtemi sen enoktsü saka sempet ji parnok ketbo matong.  Ano, tatalokba kar nungbo Nwaneri aser par medemertemi tetsürtem dang sen magütsü nungbo “International Police” parnok aputsü atema yoktsü ta sa amokmeren, ta Dinesh-isa metetdaktsü.
Khenkhen Nwaneri-i pa Western len ali takar ama sayua, pa West nung alitsü mejangrar, saka India mesüra North East Region nung pa rongsen bener arua linür ta ashi. Pai BBC, Reserve Bank of India aser Coca Cola amala company mesüra office tulutem tenüng amshia nisungtem külakoktsü.
Police-isa ashiba agi, Nwaneri ya tesüiba küm 3 tashi Delhi nung apartment tajung ka nung liyonga aru. Shitakba agibo pa indang passport ji 2013 nung expire asü saka pai taila passport ka amshia aru.
Taoba mapang Naga nunger aika aser talisa tetsürtem aika ibala mesükba inyakyim ajanga ashioktsüba ataloka lir. Ajisüaka, takoksa ajururtemi nüma metangi bilemba agi tatalokba aika police nem osang metetdaktsüi dang aruogo, ta Gupta-isa shisem.