Dimapur Police-i nisung ashioktsür telok ka apu

Dimapur, June 10 (TYO) : Dimapur police-i June 9, 2016 nü Assam nung tetsür ka dena nisung ashioktsür telok ka apu.
Police-i tai tonglokja apurtemji, Deep Jyoti Talukdar, Animesh Goswami, Mantu Padgiri, aser Pinky Moni Das nungertem lir ta jangjaogo. Parnok rongnung lennirji Jyoti lir aser pa den külemi Mantu na Barpeta nung apu aser Pinky o Animesh na Guwahati nung apu.
Iba telok yagi Sky Info Tech company tenüng amer mapa inyaka aru. Parnok indang company head office ji Guwahati nung liasü aser parnoki computer aser mobile amala electronics osettsüsettem ayok, saka police-i bushisüngdanga aodang parnoki lapokba company ji taila liasü. Shitakba Sky Info Tech company jibo Noida nungang lir, ta Dimapur police ajanga metetdaktsü.
Nisung ashioktsürtem jagi customer tem den phone ajanga facebook aser watsapp amala social media nung parnok telok nung adentsü jaok. Nisungtemi parnok telok nung adenba sülen parnoki electric osettem jenjang dalang agi ayoktsü metetdaktsü aser oset alinürtem dang account ka nung sen enoktsütsü atema ashi, saka customer temi sen enoktsüba sülenbo parnok keti osettem maru.
Police-i bushisüngdanga aodang bank account 9 tashi ngutet aser item nung sen lakh 10 tema amshiba bushitet. Iba telok yagi Upper Assam, Manipur aser Bhutan nung nisung aika ashioktsüogo, ta police-isa metetdaktsü.
May 16, 2016 nü Dimapur nung ken o ka benokba sülen police-i iba onük bushisüngdangtsü tenzük aser mobile call data, social media o bank transaction amala technical analysis ajanga nisung ashioktsürtem tsüngsü menepa apu.
June 8, 2016 nü Vishal, IPS aser Joseph, SI nati anir Dimapur nungi police telok ka Guwahati-i ao aser ashikülakertem mita oa apuba sülen Hokolbarnep Dimapur tonga anir aruogo.