Dimapur Police-i nisung tepseter ana apu

Dimapur, Chiteni/July 02, 2021 (TYO): Arishi küm 48 tain Bipul Boruah tepsetba atema, Brehostibarnü (01.07.2021) Dimapur Police-i Manoj Deb (48) aser Ranjit Debnath (50) na puogo. Dimapur kübok Old over-bridge area, Burma Camp nung Bipul yagi kidang amshiba osettsüset kar auya alitsü ta temulung melemi bilema pua alir Manoj aser Ranjit nati pa dak kanga mejungi azükba sülen, mozüki nung pa (Bipul) asü, ta Addl. Dy. Commissioner of Police (Crime) & PRO sangdong ka ajanga metetdaktsü.
Post Mortem maparen tembanger sülen, tasümang ya kinunger nem agütsüogo. Iba dak sendakba nung, East PS, Dimapur nung ken o ka benokogo.
Kasa anogo, Sema-tilla tesem nungi Scooty ka auyaba atema Dimapur Police-i Depanker Chaudhury puogo. Depanker ket nungi iba Scooty nguteta liasü. Scooty auyasang Depanker anema SBN PS, Dimapur nung ken o ka benokogo.
Maneni, kisü-jensü dang amshiba osettsüset tem bener aliba truck ka auyaa aser item oset agizüka bener aoba atema, 28.06.2021 anogo, Dimapur Police-i nisung 8 apu. Pua alir temji – Kamal Sutradhara (30), Vito Muru (31), Kato Zhimo (28), Abulovi Zhimo (28), Ghunavi Chishi ( 25), Zhekugha Shohe (33), Tovi Yeptho (32) aser Jabir Hussain (30) nunger ta jangjaogo. Parnok ket nungi .32 pistol ka ngutet. East PS, Dimapur nung parnok anema ken o ka benokogo, ta kasa sangdong nung shia lir.